Hvað eru gleðidagar?

Páskatíminn varir allt frá páskadegi og til hvítasunnu. Gleðidagar kölluðust til forna dagarnir fjörutíu frá páskum til uppstigningardags. Þá er þess minnst í kirkju og trúarlífi hvernig Jesús var upprisinn í samvistum við lærisveina sína. Í Jóhannesarguðspjalli segir:„Lærisveinarnir urðu glaðir er þeir sáu Drottin.“ (Jóh.21.20) Heiti gleðidaganna er dregið af þeirri gleði. Það er gleði endurfunda og eftirvæntingar.

Guðspjallstextar sunnudaganna eftir páskar eru flestir úr Jóhannesarguðspjalli. Íhugunarefni gleðidaganna eru um samfélagið við hinn upprisna Drottin út frá skilnaðarorðum hans þegar hann bjó lærisveina sína og vini undir aðskilnað og endurfundi og komu heilags anda. Þar eru líka orðin yndislegu um góða hirðinn: „Ég er góði hirðirinn... Ég þekki mína og mínir þekkja mig....Ég gef þeim eilíft líf.“
Þegar vorar í náttúrunni og lífið vaknar af vetrardvala þá er svo dýrmætt að hugleiða þessa texta og fá sjá lífið í gleðibirtu páskanna. Sú birta varpar ljósi sínu yfir vorhret og vonbrigði og áföll öll.

Til forna, og enn er það svo í rétttrúnaðarkirkjunni, að þennan tíma er heilsast fólk með kveðjunni: „Kristur er upprisinn!“ og fær svarið:„Kristur er sannarlega upprisinn!“

Í þeirri gleði megum við mæta hverjum nýjum degi.