ég er búin að vera spá, Sálmur 24
Um purpuraklæðið og þyrnikórónuna eftir Hallgrím, við hvaða guðspjöll eru þessu erindi kennd ? Mér finnst oft gaman að sjá hvernig höfundur nota guðspjöll og bíblíuna sér til fyrirmyndar, hvernig hann mótar þetta allt saman.

Sæll, Bjarni Steinar, og þakka þér fyrirspurnina.
Í Passíusálmi 24: Um purpuraklæðið og þyrnikórónuna notar Hallgrímur Pétursson frásögu úr Matt 27.27-31 (sjá einnig Mark 15.16-20 og Jóh 19.2-3). Þetta er átakanleg frásögn og hefur verið gerð skil í kvikmyndum um Píslarsöguna svo eftir hefur verið tekið.

"Hermenn landshöfðingjans fóru nú með hann inn í höllina og söfnuðu um hann allri hersveitinni. Þeir afklæddu hann og færðu hann í skarlatsrauða kápu, fléttuðu þyrnikórónu og settu á höfuð honum en reyrsprota í hægri hönd hans. Síðan féllu þeir á kné fyrir honum og höfðu hann að háði og sögðu: „Heill þér, konungur Gyðinga!“ Og þeir hræktu á hann, tóku reyrsprotann og slógu hann í höfuðið. Þegar þeir höfðu spottað hann færðu þeir hann úr kápunni og í hans eigin klæði. Þá leiddu þeir hann út til að krossfesta hann."

Í Gamla testamentinu og Apókrýfubókunum er á nokkrum stöðum talað um purpuraklæði/kápu/skikkju, t.d. í 1Makk 10.20: "Vér höfum því í dag skipað þig æðsta prest þjóðar þinnar og veitt þér að kallast vinur konungs. Ætlum vér þér að annast málefni vor og varðveita vináttu vora.“ Einnig sendi hann Jónatan purpuraskikkju og gullkórónu."

Sjá einnig 1Makk 10.62, 2Makk 4.38, Dan 5.7, 16, Jer 1.11 og Esk 27.24.

Purpurinn er konungstákn og kórónan einnig, eins og þekkt er. Háðung Jesú er því alger - hann er dubbaður upp í konungsklæði, táknmynd valdsins, um leið og hann er sviptur bæði sjálfsforræði og sjálfsvirðingu.

Læt þetta duga - skrifaðu endilega aftur ef þig langar að vita meira.
Bestu kveðjur,
María Ágústsdóttir, héraðsprestur, Hallgrímskirkju.