Eru Baptistar á Íslandi? Ef svo er hvað eru þeir þá margir? Og eru sérstakar baptistakirkjur á Íslandi?

Á hvaða hátt er þeirra trú frábrugðin okkar trú?

Komdu sæl, Elísabet.

Þakka þér fyrir þessa spurningu um baptista á Íslandi.

Hjá Hagstofu Íslands er skráð eitt trúfélag undir nafninu Baptistakirkjan. Það er staðsett í Njarðvík, rétt við innganginn að herstöðinni fyrrverandi. Þar er tilgreindur prestur og trúboði Patrick V. Weimer og eru skráðir safnaðarmeðlimir 14. Heimasíða kirkjunnar, sem heitir upp á ensku First Baptist Church, er www.simnet.is/wrights. Ekki veit ég um framtíð þessa trúfélags eftir að herinn er farinn.

Sumsstaðar í heiminum eru baptistar stór hluti hins kristna samfélags. Í Bandaríkjunum eru t.d. um tveir þriðju hlutar kristinna blökkumanna baptistar - Martin Luther King var baptisti - og á Bahamaeyjum tilheyra 32% íbúanna þessari grein kristninnar. Baptistar eru aðilar að Kirknaráði Evrópu og Heimsráði kirkna. Þetta er svokölluð reformert, evangelísk mótmælendakirkja sem felur í sér að hún á sér rætur til þess arms siðbótar 16. aldar sem kennd hefur verið við Kalvín. Það merkir m.a. að baptistar skilja brauð og vín kvöldmáltíðarinnar sem tákn fyrir blóð og líkama Jesú og máltíðin er fyrst og fremst minningarmáltíð, ekki endurlifun þess veruleika sem Jesús Kristur kom til leiðar í krossfestingunni.

Aðalmunurinn á kenningum baptista og okkar þjóðkirkjufólks er þó skilningurinn á skírninni. Sjálft orðið baptisti er dregið af gríska orðinu baptizo, sem má þýða með "að dýfa undir vatn". Baptistar skíra sem sagt niðurdýfingarskírn og leggja áherslu á meðvitaða ákvörðun hins trúaða um að skírast, þannig að börn eru ekki skírð. Þetta eiga þeir sameiginlegt með t.d. ýmsum örmum hvítasunnuhreyfingarinnar, sem á sér styrkar stoðir hér á Íslandi.

Annað er mikilvægt fyrir sjálfsskilning baptista og veldur því að félagslegar umbætur og mannréttindi eru þeim mikið baráttumál, en það rík áhersla á tjáningar- og trúfrelsi. Í því máli, sem og í mörgum öðrum, ættu aðrar kristnar kirkjudeildir að vera þeim algerlega samstíga. Öll byggjum við jú á hinum eina kærleiksboðskap Jesú Krists og höfum öll jafn mikla þörf fyrir hjálp heilags anda til að sýna elskuna í verki.

Bestu kveðjur,
María Ágústsdóttir