Góðan daginn

Spurningin sem ég er með er svolítið sérstök og hefur komið upp í rökræðum mínum í sambandi við fólk sem er ekki mikið fyrir trú, og þar sem ég finn ekki svar í bibíunni við henni læt ég hana fara hér . ég er spurður hvernig það geti verið að guð skapaði Adam og Evu og þetta er einmitt það sem er deilt um hann skapaði einungis Adam og Evu síðan fjölguðu þau sér og hvað áttu þau síðan börn með sínum börnum eða hvað það kemur framm að þau fjölguðu sér en ekki hvernig vona að það sé einhvert vit í þessu með von um svar

Kveðja,
Axel

Ég skil spurningu þína svona: Hafi Guð skapað Adam og Evu, hvernig átti þá fjölgun mannkyns sér stað, ef þau og börn þeirra voru þau einu sem til voru?

Rifjum upp hvað Biblían hefur að segja um þetta. Í henni er að finna tvær sögur um sköpun mannsins, aðra í 1. kafla og hina í 2. kafla. Í þeirri fyrri er sagt að Guð hafi skapað manninn í sinni mynd, karl og konu, og í þeirri síðari að maðurinn Adam hafi verið skapaður úr mold jarðar og Eva úr rifi mannsins. Í fyrri sköpunarsögunni er að finna hvatningu til mannsins um að fjölga sér og í kjölfar þeirrar seinni er frásagan um Adam og Evu í Paradís, syndafallið og upphaf fjölskyldusögu þeirra. Þar segir frá því að þau hafi eignast tvo sonu, Kain og Abel og að þeir hafi fundið sér kvonfang og stofnað fjölskyldu. Ekki er minnst á hvaðan eiginkonurnar komu og það (ásamt ýmsu öðru) hefur vakið upp spurningar um gildi og merkingu sköpunarsagnanna.

Flestir kristnir menn eru sammála um að megin innihald sköpunarfrásagnanna sé að Guð skapaði. Hvernig hann fór að því að hve langan tíma það tók er hins vegar ekki ljóst, enda eru sköpunarsögurnar ekki vísindafrásögur og svara því ekki slíku. Hvort sem við því aðhyllumst vísindakenningar um þróun mannsins eða teljum Adam og Evu vera fyrsta mannfólkið, þá dregur það ekki úr þeirri sköpunartrú sem Biblían boðar. Sköpunin er sístætt ferli, lífið heldur áfram og ef við trúum að Guð hafi skapað manninn, gat hann þá ekki alveg eins haldið áfram að skapa fleira fólk eftir þau tvö fyrstu? Gat hann ekki notað aðrar aðferðir, s.s. þróun? Aðferðarfræðin er óljós, en rótin og árangurinn vís. Að mínu mati skiptir mestu fyrir kristinn einstakling að trúa að Guð sé að baki allri sköpun, allri veröld okkar, og að hann hafi skapað okkur mannkyn í sinni mynd, til samfélags við hann. Það er það sem skiptir máli.

Kveðja,
Íris Kristjánsdóttir