Hvaða kenningar hefur kirkjan gagnvart kenningum Darwins um að við séum kominn af öpum?

Er maðurinn eins og hver önnur dýrategund eða erum við frábrugðinn dýrum á einhvern hátt?

Blessaður Már,

Eins og fram kemur í öðru svari mínu hér á vefnum erum við ekki komin af öpum - hvorki í skilningi trúar né vísinda. Menn og núlifandi apar eiga sér sameiginlegan forföður - samkvæmt kenningum Darwins. Í þeirri grein ræði ég líka nánar um það hvers vegna ekki urðu átök um þær kenningar innan þeirrar kirkjudeildar sem íslenska þjóðkirkjan tilheyrir.

Því til viðbótar má nefna að kristin kirkja játar að Guð hafi skapað heiminn. En þótt fulltrúar þessarar kirkju hafi - bæði fyrir og eftir árið 1859 er Darwin sendi frá sér ritið Uppruna tegundanna - sent frá sér aragrúa rita, hugvekja, predikana, sálma og fræðiefnis, hefur lítið sem ekkert þeirra fjallað um það hvernig nákvæmlega Guð stóð að þessari sköpun. Þær hugmyndir hafa ekki verið ofarlega á baugi innan þeirrar ríkulegu guðfræði sem kirkjan okkar hefur getið af sér. Náttúruvísindin svara slíkum spurningum. Ástæðan er fyrst og fremst sú að evangelísk lúthersk kristni lítur svo á að Guð sé okkur hulinn í sínu innsta eðli. Það er ekki okkar að skilja með hvaða hætti hann vinnur sín verk. Menn úr þessari kirkjudeild hafa fremur gefið sig að því að horfa til mannsins og þeirra tilvistarspurninga sem hann glímir við.

með kærri kveðju,

Skúli