Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

María Ágústsdóttir

Til unnenda kirkju og kristni

23. júní 2011

Nú gengur mikið á í umræðunni um kirkju og kristni á Íslandi. Gjarnan er vísað til “almennings” eða “þjóðarinnar” eða “fólksins í landinu” og gert ráð fyrir að þær óljósu stærðir vilji hag þjóðkirkjunnar sem minnstan og helst koma biskupi frá. Ég spyr mig með hvaða valdi slíkar fullyrðingar séu settar fram. Hver er þessi “almenningur” sem iðulega er gert ráð fyrir að hafi sömu skoðun og þau sem gefa tóninn í umræðunni?

Ég leyfi mér að minna á hinn stóra hóp trúaðs og trúfasts kirkjufólks, bæði innan þjóðkirkju og í öðrum kristnum trúfélögum. Fáa þekki ég í þeim hópi sem láta fjúka gífuryrði og órökstudda gagnrýni á menn og málefni kirkju og kristni. Gagnrýni er vissulega þörf á hverri tíð en hún þarf að vera málefnaleg og laus við persónulegt hnjóð. Umræðan eins og hún hefur verið gerir fátt annað en að fita púkann á fjósbitanum, svo vitnað sé í gamla íslenska þjóðsögu.

Nú er þörf á því að taka höndum saman og horfa fram á veginn, í stað þess að fólk skipi sér í skotgrafir. Við sem unnum kirkju og kristni finnum til undan umræðunni, ekki síst vegna hinnar hróplegu mótsagnar sem er á milli málflutnings skoðanamótendanna og þess dýrmæta samfélags sem þjóðkirkjan og aðrar kristnar kirkjur hafa upp á á bjóða. Verum dugleg að vekja athygli á því sem gott er gert, minnumst hins kyrrláta og trúfasta starfs sem unnið er í söfnuðum landsins, með börnum og ungmennum, fjölskyldum og öldruðum, já alls konar fólk á öllum aldri.

Hvers eigum við hin fjölmörgu að gjalda sem finnum kröftum okkar farveg í samfélagi trúaðra og í hinni hóglátu þjónustu við söfnuðina, hvort sem er í launuðu eða ólaunuðu starfi? Það er sárt að finna ævistarfið og lífsköllunina, að ekki sé talað um hinar helgustu trúartilfinningar, troðið í svaðið eins og gert hefur verið í hinni opinberu umræðu. Fylkjum okkur um hið góða sem gert er og munum að Guð á ávallt útgönguleið, líka út úr því öngþveiti sem við virðumst vera stödd í núna.

Um höfundinn



3 viðbrögð við “Til unnenda kirkju og kristni”

  1. Bára Friðriksdóttir skrifar:

    Vel mælt María. Fleiri slíkar raddir þurfa að heyrast.

  2. Fanney Halla Pálsdóttir skrifar:

    Ágæta María

    Ég þakka fyrir góða grein. Ég er ein af þeim sem hefði sagt mig úr þjóðkirkjunni ef herra Karl Sigurbjörnsson biskup Íslands hefði sagt af sér sem biskup Íslands. Í þessu tilviki er herra Karl Sigurbjörnsson biskup Íslands fórnarlambið og sá sem er hæddur fyrir réttlætis sakir.

    Þetta umfjöllunarefni er sett þannig upp að hver sem stendur með biskupi Íslands er annað hvort álitinn hrotti eða þá að þau lóð færu á vogarskálar hrotta. Tek ég eðlilega fram að í þeim hópi sem stöndum með biskupi Íslands herra Karli Sigurbjörnssyni erum við mörg sem hann hefur staðið með. Biskup Íslands herra Karl Sigurbjörnsson hefur lagt til vinnu hröktum börnum í hag langt umfram það sem hægt er að ætlast til af biskupi Íslands að hann leggi fram.

    Það er eitt að menn einangri herra Karl Sigurbjörnsson biskup Íslands svo gersamlega frá þeim sem treysta þá góðu vinnu sem herra Karl Sigurbjörnsson hefur lagt fram en annað og alvarlega að það eru e-h prestar landsins sem tryggja þá einangrun. Þetta eru í raun starfsaðferðir hrottans að einangra fórnarlambið þannig að enginn komi því til hjálpar.

    Ég biðst velvirðingar á að setja þetta hér því þú hvetur okkur til að taka höndum saman. Hins vegar er hvergi boðið upp á að setja þessa hlið fram og því var kærleikur þinn og góðmennska vel þeginn og biðst ég aftur velvirðingar á að notfæra mér hann.

    Mínar innilegustu þakkir og góðar kveðjur,

    Fanney Halla Pálsdóttir

  3. Benedikt Jóhannsson skrifar:

    Gott innlegg María og skrifað af hugrekki gegn enn einni múgæsingunni í íslensku þjóðfélagi.

Allur réttur áskilinn © 2000-2017 Höfundar og þjóðkirkjan. Flettingar 2363.


Pistlar
Postilla
Almanak
Spurningar