Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Guðrún Karls Helgudóttir

Biskupsvígðar konur?

22. mars 2011

Biskupsskyrta

Eitt sinn ætlað ég ætlaði að heilsa kollega mínum sem ég var að hitta í fyrsta sinn. Hann var prestur í annarri sókn. En viti menn og konur. Hann tók ekki í framrétta hönd mína! Ég stóð þarna eins og aðskotahlutur, með útrétta hönd en hann gætti sín á því að líta ekki í augun á mér, sneri sér undan og gekk í burtu. Þetta atvik átti sér stað þegar ég starfaði sem prestur í Gautaborgarstifti í Svíþjóð.

Eitt sinn, í sama landi, tók ég þátt í stórri messu þar sem nokkrir prestar þjónuðu saman. Ég hafði það fína hlutverk að blessa efnin, brauðið og vínið. Þegar ég gekk fyrir altarið og hóf að biðja, þá stendur kollegi minn upp og gengur út úr kirkjunni. Hann sat á fremsta bekk og reyndi ekki að láta lítið fyrir sér fara. Eftir messuna var mér tjáð að hann væri mjög á móti prestvígslu kvenna.

Þetta er ekki algengt viðhorf innan sænsku kirkjunnar enda hefur hún markvisst reynt að sporna við þessu. Konum í ábyrgðarstöðum fjölgað hratt í sænsku kirkjunni undanfarna áratugi og þykir það ekki tiltökumál lengur að konur séu biskupar. En því miður eru nokkrir prestar eftir sem telja prestvígslu kvenna vera gegn vilja Guðs og því ekki gilda.

Þetta er ekki vandamál á Íslandi. Í Þjóðkirkjunni er enginn prestur opinberlega á móti prestvígslu kvenna. Staða prestvígðra kvenna í Þjóðkirkjunni endurspeglar aftur á móti stöðu kvenna annarsstaðar í íslensku samfélagi. Hér eru lög og reglur yfirleitt til fyrirmyndar en misbrestur er á að þeim sé framfylgt. Þetta á við um margar stofnanir íslensks samfélags. Ekki síst hinar æðstu.

Þannig er jafnréttisáætlun kirkjunnar góð en þar sem henni hefur ekki verið nægilega framfylgt þá er hún þegar fallin um sjálfa sig.

Brátt kemur að því að stór hluti presta og töluvert af leikfólki muni ganga til kosninga og velja sér vígslubiskup í Skálholtsstifti. Þau sem hafa gefið kost á sér eru öll frambærileg og ég treysti hverju og einu þeirra til þess að sinna embættinu með sóma.

Um leið er það svo að nú höfum við tækifæri til að styrkja þjóðkirkjuna í því að vera samfélag fólks sem breytir eins og það boðar í stað þess að vera samfélag fólks sem gerir fínar reglugerðir og áætlanir en fer ekki eftir þeim.

Vonandi munum við brátt tala um biskupa í kvenkyni jafnt sem karlkyni.

Um höfundinn



4 viðbrögð við “Biskupsvígðar konur?”

  1. Solveig Lára skrifar:

    Takk Guðrún…góð grein..
    Kær kveðja
    Solveig Lára

  2. Lena Rós skrifar:

    Orð í tíma töluð, takk fyrir það!

  3. Sigurður Hafþórsson skrifar:

    Hef oft velt því fyrir mér hversu mikill munur það er í þessum málum á Íslandi och í Svíþjóð. Það kom mér í opna skjöldu þegar ég frétti að þau som eru á móti prestvígslu kvenna væru þó þetta skipulögð og opin með fordóma sína.

  4. Guðmundur Pálsson læknir skrifar:

    Heilög kaþólsk og orþódox kirkja hvarvetna um heim hafnar þeim kosti að hafa prestvígðar konur og biskupa.

    Hvernig haldið þið að þessar kirkjur yrðu með súfragettur úti um alla kirkjuganga að rífast um bikara, krossa, laun, jafnrétti og leggjandi fram kærur hægri vinstri? Kynferðisleg áreitni og hann kallaði mig kerlingu? Kirkjan færi á hliðina á 50-100 árum!

    Í þessu er auðvitað sannleikskorn en þó er líklegra að konur vilji ekki samþykkja þá byggingu sem kirkjan er. Sjálfan strúktúrinn, hlíðnina, agann og fórnfýsina sem er annað hvort ekki skiljanleg eða ásættanleg.

    Nei, ég spyr mig enn: Hversvegna skyldu þessar kirkjur sem næstum tveir milljarðir manna eru hluti af, hafna þessarri saklausu, fallegu og sjálfsögðu ósk kvennanna um hlutdeild í prestvígslunni?

Allur réttur áskilinn © 2000-2017 Höfundar og þjóðkirkjan. Flettingar 3063.


Pistlar
Postilla
Almanak
Spurningar