Mig langar að vita hvað vitringarnir hétu?

Sæl vertu og takk fyrir spurninguna.

Mattheusarguðspjall greinir frá heimsókn vitringanna. Þar er reyndar ekki sagt hve margir þeir voru, en gjafirnar sem nefndar eru gull, myrra og reykelsi, hafa líklega leitt til þeirrar hefðar að tala um þrjá vitringa. Í kirkjusögunni voru þó til tilgátur um að þeir hafi verið tólf eða jafnvel fleiri.

Hverjir voru þeir?
Gríska orðið yfir þessa menn er magoi, eintala magos. Þeir komu úr austri og fylgdu stjörnu og því hafa þeir oft verið tengdir við prestastétt Zaraþúststratrúar, sem lagði stund á stjörnuspeki.

Þeir gætu hafa komið frá Persíu (Íran) eða frá Babýloníu þar sem stjörnuspeki var með miklum blóma. Fleiri kenningar eru þó til um uppruna þeirra. Ein tilgátan er Arabía, en þar var að finna allar gjafirnar og það í ríkum mæli en Indland og fleiri lönd hafa verið nefnd.
Spurning þeirra til Heródesar "hvar er hinn nýfæddi konungur Gyðinga" bendir til þess að vitringarnir hafi ekki verið Gyðingar sjálfir né sérlega kunnugir stjórnmálum í Ísrael á þessum dögum.

Hvað hétu þeir?
Í Vesturkirkjunni (sem nú nær yfir rómversk kaþólska og mótmælendur) hafa vitringarnir hafa verið nefndir Kaspar, Melkíor og Baltasar. Mósaíkmynd í Ravenna á Norðaustur-Ítalíu, frá um 550 e. Kr., er elsta heimild um þessi nöfn og eru þau endanlega fest í vesturkirkjunni á 12. öld. Þau eru líklega dregin af Gathaspa, Melichior og Bithisarea, sem fyrst birtast okkur í ritinu Excerpta latina barbari, frá 8. öld, en sem talið er vera þýðing á grískum texta frá því um 500.

Í Austurkirkjunni, þ.e. rétttrúnaðarkirkjum, eru mun fleiri kenningar um nöfn vitringanna. Í riti, sem talið er vera eftir Efraim hinn sýrlenska frá 4.öld, eru konungarnir einnig sagðir hafa verið þrír: Hormizdad frá Makhozdi í Persíu, Izdegerd frá Saba, og Perozad frá Shaba í austri. Og á í Bók Adams og Evu, sem talið er að hafi verið rituð einhvers staðar á bilinu 3.-7. öld, eru þeir nefndir Hor, Basantar og Karsundas. Fleiri nöfn eru til, þar á meðal tólf nöfn er fylgja sögu um að þeir hafi verið tólf persneskir konungar.