2. sunnudagur páskatímans (Misericordias domini)

Litur: Hvítur

Vers vikunnar:
Jesús sagði: „Ég er góði hirðirinn. Mínir sauðir heyra raust mína og ég þekki þá og þeir fylgja mér. Ég gef þeim eilíft líf og þeir skulu aldrei að eilífu glatast.“ (Jóh 10.11a, 27-28a)

Bæn dagsins:
Drottinn Jesús Kristur, þú ert góði hirðirinn sem leiðir okkur á þínum vegum og lætur okkur ekkert skorta. Þú yfirgefur okkur aldrei. Þú ert hjá okkur allan æviveginn, frá vöggu til grafar, þegar við fæðumst og þegar við deyjum. Við biðjum þig. Halt þú utan um okkur, hjörðina þína, eins og góður hirðir, haltu áfram að leita að þeim týndu og safna þeim saman sem villast frá. Vernda þau sérstaklega sem eru ekki af þínu sauðahúsi eða er ekki kunnugt um það. Gakk í veg fyrir þau sem ráðast á hjörðina, eins og blóðþyrstir úlfar, meiða og deyða og snú þeim frá. Gef líf og lækningu hinu særða og mædda, þú sem lifir og ríkir að eilífu. Amen.

Þriðja lestraröð

Lexía: Jer 23.1-6
Vei hirðunum sem leiða sauðina afvega og tvístra hjörðinni sem ég gæti, segir Drottinn. Þess vegna segir Drottinn, Guð Ísraels, um hirðana sem gæta þjóðar minnar: Þér hafið tvístrað sauðum mínum og sundrað þeim og ekki sinnt þeim. Nú mun ég draga yður til ábyrgðar fyrir illvirki yðar, segir Drottinn. En ég mun sjálfur safna saman þeim sem eftir eru af sauðum mínum frá öllum þeim löndum sem ég tvístraði þeim til. Ég mun leiða þá aftur í haglendi þeirra og þeir verða frjósamir og þeim mun fjölga. Ég mun setja hirða yfir þá sem munu gæta þeirra. Þeir munu hvorki skelfast framar né óttast og einskis þeirra verður saknað, segir Drottinn.
Sjá, þeir dagar koma, segir Drottinn, að ég mun láta réttlátan kvist vaxa af ætt Davíðs. Hann mun ríkja sem konungur, breyta viturlega og iðka rétt og réttlæti í landinu. Um hans daga verður Júda bjargað og Ísrael mun búa óhultur. Þetta er nafnið sem honum verður gefið: „Drottinn er réttlæti vort.“

Pistill: Heb 13.20-21
Guð friðarins, sem leiddi Drottin vorn, Jesú, hinn mikla hirði sauðanna,upp frá dauðum með blóði eilífs sáttmála, styrki yður í öllu góðu í hlýðni við vilja sinn. Láti hann allt það verða í oss sem honum er þóknanlegt fyrir Jesú Krist. Honum sé dýrð um aldir alda. Amen.

Guðspjall: Jóh 10.1-10
„Sannlega, sannlega segi ég yður: Sá sem kemur ekki um dyrnar inn í sauðabyrgið heldur fer yfir annars staðar, hann er þjófur og ræningi en sá sem kemur inn um dyrnar er hirðir sauðanna. Dyravörðurinn lýkur upp fyrir honum og sauðirnir heyra raust hans og hann kallar á sína sauði með nafni og leiðir þá út. Þegar hann hefur látið út alla sauði sína fer hann á undan þeim og þeir fylgja honum af því að þeir þekkja raust hans. En ókunnugum fylgja þeir ekki heldur flýja frá honum því þeir þekkja ekki raust ókunnugra.“
Þessa líkingu sagði Jesús þeim. En menn skildu ekki hvað það þýddi sem hann var að tala við þá.
Því sagði Jesús aftur: „Sannlega, sannlega segi ég yður: Ég er dyr sauðanna. Allir þeir sem á undan mér komu eru þjófar og ræningjar enda hlýddu sauðirnir þeim ekki. Ég er dyrnar. Sá sem kemur inn um mig mun frelsast og hann mun ganga inn og út og finna haga. Þjófurinn kemur ekki nema til að stela og slátra og eyða. Ég er kominn til þess að þeir hafi líf, líf í fyllstu gnægð.

Sálmur 730
Ég á mér hirði hér á jörð,
sem hefur gát mér á.
Hann blessar mig og býður nægð,
mig bresta ekkert má.

Ef eigra ég um eyðisand
og enga leið ég finn,
hann leiðir mig á græna grund
og greiðir feril minn.

Við vötnin hans ég næðis nýt,
svo nærist sál og líf,
hans helga nafn mér vísar veg,
og veitir skjól og hlíf.

Þótt fari ég um dimman dal
er Drottinn samt mér hjá.
Ég trúi' á hann og ekkert illt
mér ótta vekur þá.

Ég styðjast vil við staf þinn, Guð,
mig styrkir sproti þinn.
Í hverri neyð þú býr mér borð
og bikar fyllir minn.

Já, fylgja mun mér gæfa Guðs,
sem gengur mér við hlið
og alla daga ævinnar
ég á hans náð og frið.

Sl 23 - Svavar A. Jónsson