Ég er stelpa sem kem frá útlöndum. Ég er ekki skírð, mig langar að ferma mig eins og allir aðrir en þarf ég ekki að vera skírð til að ferma mig?

Hvernig skrái maður sig í fermingu?

Til hamingju með að ætla að fermast!

Þú skráir þig hjá presti í kirkjunni í sókninni þar sem þú átt heima. Þú getur fundið upplýsingar um sóknina þína hér: http://kirkjan.is/soknir. Í kirkjum landsins eru haldin fermingarnámskeið og þú færð nánari upplýsingar um fræðsluna þegar þú skráir þig.

Orðið ferming er þýðing á latneska orðinu confirmatio sem merkir staðfesting. Segja má að kirkjan staðfesti með fermingunni kristindómsþekkingu þína og játningu. Hún er mikilvæg yfirlýsing af þinni hálfu um að vilja hafa Jesú Krist og allt það góða sem hann kenndi sem fyrirmynd á lífsgöngunni. Fermingar hafa verið við lýði á Íslandi frá því á 16. öld. (sjá umfjöllun á Vísindavefnum: http://visindavefur.hi.is/svar.asp?id=3451) Fermingin er á vissan hátt staðfesting þess að barnið sem skirt var í bernsku hafi hlotið skírnarfræðslu þ.e.a.s. lært um inntak kristinnar trúar og ábyrgð kristins manns gagnvart öðrum fólki og lífinu í heild. Fermingin kemur því í kjölfar skírnarinnar. Og þar af leiðir, fyrst þú ert ekki skírð, að þú þarft að skírast áður en fermingin fer fram. Yfirleitt skíri ég eitt eða fleiri væntanleg fermingarbörn á hverju ári. Síðast liðið vor skírði ég til að mynda stúlku sem fermdist síðar um vorið og móður hennar líka sem aldrei hafði skírst.

Með bestu kveðju,
Örn Bárður Jónsson,
sóknarpresetur Neskirkju í Reykjavík.