Hvað er/táknar helgitáknið/myndin lútersrós eða lútersk rós ?
Þetta sést m.a. á sálmabókum.
Með fyrirfram þökk.
Sigríður G.

Komdu sæl Sigríður.

Lúthersrósin var innsigli Marteins Lúthers. Hún er birt á kápu bókar Sigurjón Árna Eyjólfssonar Tilvist, trú og tilgangur. Þar er einnig að finna skýringu á henni sem er á þessa leið:

„Lútherrósin svonefnda var innsigli siðbótarfrömuðarins. Lúther hannaði innsiglið sjálfur. Merkingu rósarinnar skýrði hann með þessum hætti: Innst er kross sem minnir okkur á að Kristur vill fyrir trúna eiga bústað í hjarta okkar. Krossinn á að vera svartur, því að Kristur frelsar okkur fyrir dauða sinn á krossi og vill deyða í okkur allt sem er syndugt og saurugt. Hjartað er rautt, því að það hreinsast fyrir blóð Krists. Utan um hjartað hverfist hvít rós, því að Kristur hreinsar okkur og skrýðir okkur dýrð og ljóma himinsins. Himinbláminn utan um rósina merkir að Kristur hefur búið okkur sæti á himinhæðum. Og yst er gylltur hringur sem merkir eilífa dýrð Guðs, sem við munum reyna og sjá.“

Með kveðju,
Árni Svanur Daníelsson