Heil og sæl

Frá því að ég var barn hef ég velt vöngum yfir vanmætti hins svonefnda guðs; hann er sagður hafa skapað allt, bæði gott og illt, en samt er hann sagður vera endalaust kærleiksríkur og góður.
Hann skapar náttúruhamfarir sem valda miklum hörmungum á meðal okkar barna hans.

Ég spyr yður: Hvernig fara þessar sömu hliðar hins þríeina guðs saman?

Sæll og blessaður.

Í kristinni trú er gengið út frá því að leyndardómar Guðs séu okkur að stóru leyti huldir. Páll postuli segir: „Nú sjáum vér sem í skuggsjá, í ráðgátu, en þá munum vér sjá auglitis til auglitis“ (1 Kor 3. 12) og vísar þar til þeirra takmarkana sem dauðlegir og takmarkaðir menn þurfa að lúta gagnvart því sem lýtur ekki takmörkunum í tíma eða rúmi.

Lúther talar um það að Guð birtist okkur aðeins í kærleika og umhyggju. Þar vísar hann til þess hvernig Guð birtist okkur í Jesú Kristi sem leið þjáningar og dó á krossi okkur til handa. Bölið í heiminum er sú hlið Guðs sem okkur er hulin. Þar hylur Guð andlit sitt fyrir okkur.

Hinn þríeini Guð er á vissan hátt viðbrögð manna við þessari ráðgátu. Samkvæmt þrenningarlærdómi kirkjunnar þekkjum við þessar þrjár ásjónur Guðs: Föðurinn sem skapar heiminn; soninn, sem frelsar okkur og heilagan anda sem er alls staðar nálægur.

Skúli S. Ólafsson