Sæl og takk fyrir góðan vef.

Nú var svo komið að okkur langaði að láta skíra barnið okkar og ala það upp í kristinni trú eins og við vorum alin upp í. Við skírðum barnið okkar á laugardegi í kirkju í heimabæ föður barnsins. Þetta er smábær útá landi. Allavega þá var hún stutt og fámenn athöfn. Þegar kemur að því að gera upp við prestinn þá borgum við 10.000 kr. Mér persónulega finnst það rosalega dýrt! Við erum bæði námsmenn í Háskóla og rosalegt ef fólk þarf að hugsa sig tvisvar um að láta skíra barnið sitt því það er svo dýrt. Fyrir utan það að við fengum ekki Biblíu barnanna sem ég hlakkaði svo til að fá og getað lesið fyrir barnið mitt. Margar vinkonur mínar eignuðust barn á árinu og hef ég heyrt kostnað á milli 0-3.500 og fengu auk þess bók til að lesa fyrir barnið þegar þar að kemur. Langaði bara að vita hvort presturinn hafi farið yfir strikið eða að þetta gæti verið svona dýrt!

Kær kveðja
lítil fjölskylda utan af landi

Sæl og til hamingju með barnið, megi góður Guð blessa það og ykkur öll um alla framtíð. Varðandi gjaldtöku vegna skírnar:

Þótt prestar Þjóðkirkjunnar séu á föstum launum hefur það haldist óbreytt að þeim er ætluð sérstök þóknun fyrir prestsverk eins og skírnir.
Í því skyni gefur dóms- og kirkjumálaráðuneytið út gjaldskrá til tíu ára í senn en það fyrirkomulag byggir á lögum nr. 36/1931 sem aftur byggja á eldri lögum.

Skv. gildandi gjaldskrá á ekki að greiða viðkomandi presti fyrir skírn sem fer fram í guðsþjónustu/messu og eiga foreldrar þannig kost á að láta skíra barnið sitt án þess að því fylgi nein útgjöld.

Kjósi foreldrar hins vegar að efna til sérstakrar skírnarathafnar gerir gjaldskráin ráð fyrir því að prestinum séu greiddar kr. 3.500,- og að auki aksturskostnaður skv. viðurkenndu kílómetragjaldi ríkisins en þó aldrei meira en 30 km í dreifbýli. Miðað við núgildandi kílómetragjald (kr. 68,50) ætti heildarupphæðin til prests aldrei að geta farið yfir kr. 5.555,-

Þetta gildir ef leitað er til viðkomandi sóknarprests en sé prestur kallaður til prestsverks um langan veg kann ferðakostnaður að hækka,

Í sumum kirkjum tíðkast að taka gjald af aðstandendum vegna kirkjulegra athafna, annaðhvort til kirkjunnar eða til kirkjuvarðar sem þarf að gera sér ferð í kirkjuna vegna athafnar. Um þetta gilda því miður engar samræmdar reglur.

Kær kveðja,
Ólafur Jóhannsson