Hæ.

Ég hef séð að prestar eru í mismunandi litum fötum í messunni. Getið þið sagt mér eitthvað meira um þetta?

Kveðja,
Sjöfn

Komdu sæl.

Þetta er áhugaverð spurning og greinilegt að spyrjandinn er mjög eftirtektasamur kirkjugestur. Því við getum fylgst með því hvar við erum stödd í kirkjuárinu með því að taka eftir í messunni hvaða litur er á skrúða okkar prestanna. Þ.e á höklinum og stólunni. Í sumum kirkjum eru einnig altariklæði, sem er n.k dúkur sem lagður er á altarið, dúkur sem lagður er yfir altarissakramentin og borði á predikunarstólnum sem eru í sömu litum.

Áður en ég skoða með ykkur litina og merkingu þeirra langar mig því aðeins að fara með ykkur í gegnum messuskrúðann.

Innst er svört hempan sem er embættisklæðnaður okkar presta en það er all langt síðan að hætt var að nota hana dagsdaglega og er hún nú í raun orðin hluti af skrúðanum hér á Íslandi.

Þá er það hvíta rykkilínið sem táknar hreinleikann og bendir til upprisu Jesú Krists frá dauðum.
Yfir rykkilínið kemur svo stólan sem er í litum kirkjuársins og táknar stólan það ok sem Jesús Kristur bar, þá erfiðleika sem hann þurfti að ganga í gegnum fyrir okkur manneskjurnar. Jesús tók á sig erfiði vegna synda okkar, þess ranga sem við höfum gert, sagt og hugsað.

Yfir þetta allt saman kemur svo hökullinn sem táknar umboð prestsins. Í hökulinn er aðeins farið ef altarisganga fer fram í messunni. Einnig afskrýðumst við höklinum þegar predikað er.

Pípukraginn er fylgihluti skrúðans var hann upprunalega til skrauts en hafði einnig það skemmtilega hlutverk að taka við púðrinu sem kom úr hárkollunum á þeim tíma sem þær voru notaðar.
Allur skrúðinn hefur svo það hlutverk að minna okkur prestana á að við erum ekki að koma fram í eigin nafni, heldur í nafni Krists.

Víkjum okkur nú að litum kirkjuársins. Þeir eru fimm: grænn, rauður, fjólublár, svartur og hvítur.

Græni liturinn táknar vonina og vöxtinn og bendir til sköpunar Guðs. Í dag er 11.sunnudagur eftir þrenningarhátíð og því erum við á græna tímabilinu núna. Þetta er lengsta tímabilið þ.e nánast allir sunnudagarnir frá þrenningarhátíð og fram að aðventu. Tímabilið frá þrettándanum og fram að föstu er líka grænt.

Rauði liturinn er heitur, hann táknar eldinn og kærleikann. Kærleikann sem Drottinn Jesús gefur okkur svo óspart af á hverjum degi með og í sínum heilaga anda. Því er rauði liturinn notaður á hátíð heilags anda; Hvítasunnunni. Rauði liturinn er einnig notaður á minningardögum píslavotta eins t.d á annan í jólum sem er minningardagur Stefáns píslavotts.

Fjólublár er svo litur sem táknar iðrun, yfirbót og bendir okkur inn í íhugunina. Þetta er litur föstunnar bæði jólaföstunnar, eða aðventunnar sem og lönguföstu sem eru vikurnar fyrir páska. Á föstunni íhugum við það hvernig við getum orðið betri manneskjur, iðrumst og viljum bæta fyrir syndir okkar og minnumst um leið að Jesús Kristur tók á sig syndir okkar og bætti fyrir þær í eitt skipti fyrir öll með dauða sínum á krossi.

Þá er það svarti liturinn sem táknar sorgina. Það er aðeins einn dagur í kirkjuárinu sem ber svarta litinn og það er föstudagurinn langi. Svarta stólan er stundum notuð við útfarir en einnig fjólublá og hvít.

Hvíti liturinn táknar gleðina og fögnuðinn og að sjálfsögðu hreinleikann og bendir til upprisunnar. Þess vegna er hvíti liturinn litur stórhátíðanna, jólanna og páskanna.
Hvítur er einnig notaður á fyrsta sunnudegi í aðventu en þá hefst einmitt nýtt kirkjuár og er sá dagur því nokkurs konar nýársdagur í kirkjunni.