Ég er að velta fyrir mér hefðum í sambandi við trúlofun. Á hvorri hendi eiga trúlofunarhringarnir að vera? Á síðan að færa þá yfir á hina hendina við giftingu??

Sæl Heiðrún.

Sú hefð eða venja sem ég þekki er sú að trúlofunarhringarnir eru settir upp á baugfingur vinstri handar, því sú hönd er nær hjartanu. Við giftingu eru hringarnir gjarna færðir yfir á hægri höndina sem tákn um þann samning eða sáttmála sem handsalaður er þegar gengið er í hjónaband. Hjónaefnin takast í hendur í hjónavígslunni og innsigla þannig þann ásetning sinn að lifa saman í hjónabandi.

Einu sinni sagði mér eldri prestur að giftingarhringarnir væru alltaf á hægri hönd til þess að þeir væru sýnilegir þegar ókunnu fólki væri heilsað, það gæti þá auðveldlega séð að um kvænta/gifta manneskju væri að ræða. Því væri ekki hætta á því að hinn kvænti eða hin gifta yrði fyrir óþarfa ástleitni. Einnig gaf hjónabandið, hér áður fyrr, fólki ákveðna stöðu og virðingu í samfélaginu og gerir líklega enn þó með öðrum hætti sé.

Gangi þér vel,
Arna Grétarsdóttir