þarf útför að fara fram í kirju og eru einhverjarreglur um það hvort eigi að jarða í kirkjugörðum?

Sæl Guðrún.

Samkvæmt íslenskum lögum ber að jarðsetja látna í merktum grafreit eða kirkjugarði. Annað hvort er jarðsett í kistu eða ef líkbrennsla hefur farið fram þá í duftkeri. Duftker eru annað hvort jarðsett í sérstökum reit fyrir duftker eða þau eru sett ofan í leiði annars manns.
Ef um kristinn mann er að ræða er jarðsett í kirkjugarði, en ef um einstakling utan trúfélaga er að ræða er jarðsett í óvígðan reit. Hið sama gildir um einstaklinga frá öðrum trúfélögum en kristnum.

Fyrir nokkrum árum var auk þessa heimilað að þegar líkbrennsla fer fram megi í stað þess að jarðsetja duftið með þeim hætti sem hér var greint frá, megi dreifa því yfir sjó, eða á landi einhversstaðar fjarri almanna umferð og byggð. Sækja þarf um heimild til duftdreifingar til Dóms- og kirkjumálaráðuneytisins. Alls ekki er heimilt að dreifa dufti annarsstaðar en leyfi er veitt fyrir.
Í venjulegu tilfelli þegar um kristinn mann er að ræða er greftrunarferlið sjálft innleitt með athöfn í kirkju þar sem hins látna er minnst og hann falinn Guði og forsjá hans. Þessi kirkjuathöfn er þó ekki lagaleg skylda þó að hún sé venja. Mögulegt er að hafa einungis athöfn í kirkjugarðinum með ritningarlestri, bæn og moldun, þótt óvenjulegt sé (og að mínu viti öldungis óþekkt), ef viðkomandi prestur samþykkti það.
Þegar um er að ræða útfarir annarra en þeirra sem tilheyra kirkjunni, gilda venjur þess trúfélags sem viðkomandi tilheyrir, og ef um er að ræða mann sem ekki tilheyrir neinu trúfélagi er athöfnin á ábyrgð aðstandenda hans. Í þessum tilfellum getur allt að einu gilt sú meginregla að hinn látni sé fluttur beint út líkhúsi í kirkjugarð, duftreit eða til öskudreifingar á fjöllum uppi.

Til viðbótar þessu er rétt að taka fram (til þess að vera viss um að spurningunni sé svarað) að fyrir utan kirkjugarða eru einnig til heimagrafreitir á ýmsum stöðum á landinu. Þar sem heimagrafreitir eru í notkun er heimilt að jarðað sé þar. Lög heimila hinsvegar ekki að teknir séu upp nýir heimagrafreitir.

Það er því ekki heimilt að jarðsetja annarsstaðar en hér hefur verið greint frá.

Ég vona að þetta svari spurningunni, en ef ekki þá er bara að spyrja aftur!

Kærar kveðjur,
Kristján Valur