Við ætlum að gifta okkur á næsta ári en erum hvorugt í þjóðkirkjunni. Okkur langar samt að giftast í Hallgrímskirkju hjá presti.

Er ekki hægt að gifta sig í kirkju hjá presti nema að vera í Þjóðkirkjunni?

Komdu sæl.

Gildandi hjúskaparlög eru nr. 31/1993 en var lítillega breytt 1998 og 2001. Samkvæmt þeim eru löggildir hjónavígslumenn prestar Þjóðkirkjunnar, forstöðumenn annarra skráðra trúfélaga hér á landi svo og sýslumenn og löglærðir fulltrúar þeirra.

Í sömu lögum eru engin skilyrði sett um trúfélagsaðild hjónaefna. Í 22. gr. laganna er áréttað að öll hjónaefni eigi rétt á hjónavígslu hjá borgaralegum vígslumanni og jafnframt að dóms- og kirkumálaráðuneytið geti, að fengnum tillögum biskups, sett reglur um hvenær prestum sé skylt að framkvæma hjónavígslu og hvenær þeim sé það heimilt. Þær reglur hafa ekki verið settar og í reynd hindrar ekkert að hjónaefni utan Þjóðkirkjunnar geti fengið hjónavígslu Þjóðkirkjuprests í kirkju.

Hjónavígsla í einföldustu mynd felst í því að vígslumaður spyr bæði hjónaefnin hvort þau vilji stofna til hjúskaparins og lýsir þau hjón er þau hafa játað því.

Hjónavígsla hjá presti og í kirkju felur einnig í sér ritningarlestra, bænagjörð og sálmasöng. Það er eðlilegt og sjálfsagt í kirkjulegri hjónavígslu, óháð trúfélagsaðild hjónaefnanna.

Kær kveðja,
Ólafur