Hvar í Biblíunni get ég lesið um hjónavígsluform það sem Þjóðkirkjan notar ? Og eru það prestar sem gefa parið saman, eða gefast þau sjálf hvort öðru

Með fyrirfram þakklæti fyrir svarið.
Nikulás

Sæll Nikulás.

Grundvöllur hjónavígslurítuals þjóðkirkjunnar er sameiginlegur flestum kristnum kirkjum. Hann er fólginn í þeim ritningartextum sem lesnir eru við hverja hjónavígslu.

Þessa ritningarlestra les presturinn samkvæmt Handbók þjóðkirkjunnar. Þá segir hann:

Heyrum nú hvað frelsari vor og Drottinn Jesús Kristur segir um hjónabandið og samfélag lærisveina sinna:

Hafið þér eigi lesið, að skaparinn gjörði þau frá upphafi karl og konu og sagði: Fyrir því skal maður yfirgefa föður og móður og bindast konu sinni, og þau tvö skulu verða einn maður. Þannig eru þau ekki framar tvö heldur einn maður. Það sem Guð hefur tengt saman, má maður eigi sundur skilja.“ (Mt. 19. 4-6).
Nýtt boðorð gef ég yður, að þér elskið hver annan. Eins og ég hef elskað yður, skuluð þér einnig elska hver annan. Á því munu allir þekkja, að þér eruð mínir lærisveinar, ef þér berið elsku hver til annars.“ (Jóh. 13. 34-35).

Heyrum ennfremur orð Páls postula:
Berið hver annars byrðar og uppfyllið þannig lögmál Krists.“ (Gal. 6. 2).

Íklæðist því eins og Guðs útvaldir, heilagir og elskaðir, hjartans meðaumkun, góðvild, auðmýkt, hógværð og langlyndi. Umberið hver annan og fyrirgefið hver öðrum, ef einhver hefur sök á hendur öðrum. Eins og Drottinn hefur fyrirgefið yður, svo skuluð þér og gjöra. En íklæðist yfir þetta elskunni, sem er band algjörleikans. Látið frið Krists ríkja í hjörtum yðar, því að til friðar voruð þér kallaðir sem limir í einum líkama. Verðið þakklátir. (Kól. 3. 12-15).

Kærleikurinn er langlyndur, hann er góðviljaður. Kærleikurinn öfundar ekki. Kærleikurinn er ekki raupsamur, hreykir sér ekki upp. Hann hegðar sér ekki ósæmilega, leitar ekki síns eigin, hann reiðist ekki, er ekki langrækinn. Hann gleðst ekki yfir óréttvísinni, en samgleðst sannleikanum. Hann breiðir yfir allt, trúir öllu, vonar allt, umber allt. Kærleikurinn fellur aldrei úr gildi. (I. Kor. 13. 4-8).

Hvað varðar spurninguna um það hvort það eru prestar sem gefa parið saman, eða þau gefast sjálf hvort öðru er því að svara að með því að játa spurningum um tryggð og trúfesti gefast brúðhjónin hvort öðru, það er hins vegar presturinn sem lýsir því yfir að þau séu þar með orðin hjón. Þetta sést af orðalagi rítualsins:

Síðan ávarpar presturinn hvort brúðhjóna fyrir sig, fyrst brúðgumann:
Nú spyr ég þig, brúðgumi NN: Er það einlægur ásetningur þinn að ganga að eiga NN, sem hjá þér stendur?

Brúðgumi svarar:

Já.

Presturinn:

Vilt þú með Guðs hjálp reynast henni trúr, elska hana og virða í hverjum þeim kjörum sem Guð lætur ykkur að höndum bera?

Brúðgumi svarar:

Já.

Þá ávarpar presturinn brúðina:

Sömuleiðir spyr ég þig, brúður NN: Er það einlægur ásetningur þinn að ganga að eiga NN, sem hjá þér stendur?

Brúðurin svarar:

Já.

Presturinn:

Vilt þú með Guðs hjálp reynast honum trú, elska hann og virða í hverjum þeim kjörum sem Guð lætur ykkur að höndum bera?

Brúður svarar:

Já.

Sé skipst á hringum við athöfnina, má presturinn rétta hjónunum hringina með þessum orðum:

Dragið hring á hönd hvort öðru til vitnisburðar um band ástar og trúfesti.

Því næst mælir presturinn:

Gefið þá hvort öðru hönd ykkar þessum hjúskaparsáttmála til staðfestu.

Brúðhjónin rétta hvort öðru hægri hönd.

Presturinn leggur hönd sína yfir samanteknar hendur þeirra og segir:

Með því að þið hafið heitið hvort öðru að lifa saman í heilögu hjónabandi og játað þetta opinberlega í áheyrn þessara votta (þessa safnaðar) og gefið hvort öðru hönd ykkar því til staðfestu, lýsi ég því yfir að þið eruð (rétt) hjón bæði fyrir Guði og mönnum, í nafni Guðs + föður og sonar og heilags anda. Amen.

Þá krjúpa brúðhjónin á gráðurnar, en presturinn snýr sér að altarinu og biður bænar.

Ég vona að þetta svari spurningunni.
Bestu kveðjur, Kristján Valur