Hvert er álit þjóðkirkjunnar á dýrlingadýrkun kaþólsku kirkjunnar? Eru dýrlingar ekki bara falsguðir?

Á þessum dögum þegar kirkjudeildir og trúarhópar kosta kapps um að vinna saman í gagnkvæmri virðingu og kærleika reynum við að forðast gildishlaðin orð um trúarsannfæringu meðbræðra okkar.

Að margra áliti má rekja dýrlingatrú kaþólsku kirkjunnar til tilbeiðsluhefða og goðsagna heiðinna þjóða. Í því sambandi hafa menn bent á tengsl milli dýrlinga og guða í fjölgyðistrúarbrögðum. Sem dæmi minna frásagnir af Maríu mey á sögur af gyðjunni Venus. Hið sama gildir um myndir og minni sem tengjast einstökum dýrlingum. Dýrlingatrúin hefur e.t.v. verið eins konar brú á milli fjölgyðis- og eingyðistrúarbragða þegar kristnin festi rætur í Evrópu og víðar.

Rómversk kaþólska kirkjan hafnar því þó að dýrlingar séu tilbeðnir sem guðir. Menn á þeim bænum líta svo á að dýrlingarnir greiði dauðlegum breyskum mönnum leiðina að Guði. Menn heita gjarnan þá til þess að forðast refsingu Guðs og tyftandi vald hans. Tilbeiðsla á Guðsmóðurinni beindist einkum á þær brautir. Í Lilju Eysteins biður skáldið þess að María linni þrautir hans í hreinsunareldinum:

“Verða kann að mærin minniz
mín, þás ligg eg kvaldr í pínu,“

Þarna birtist María sem líknandi mótvægi við hinn refsandi Guð.

Þjóðkirkjan hafnar dýrlingatrú í þessari mynd. Mannskilningur hennar byggir á því að allir kristnir menn séu bæði syndarar og heilagir. Þeir eru syndarar þar sem erfðasyndin hvílir á öllum mönnum en í augum Guðs eru þeir þó heilagir – hvítþvegnir af syndum sínum fyrir blóð Krists. Heilagur andi gefur manninum trúna á Krist og helgar hann með þeim hætti. Með trúnni endurnýjar hver maður líkama og sál og leitast stöðugt við að bæta líf sitt í þeim anda sem trúarsannfæring hans býður.

Því er ástæðulaust að tilnefna einhverja útvalda sem sérstaka dýrlinga sem hópurinn lítur til. Hver kristinn maður hefur þessa stöðu og mætir Guði sínum í krafti trúar sinnar.

Menn geta valið sér góðar fyrirmyndir í lífinu og sannarlega eiga kristnir menn margar slíkar. Samviska kristins manns og öll trúarsannfæring hans er þó bundin af Orði Guðs og engu öðru, samkvæmt lútherskri kenningu.