Spurningar - Trúin og lífið

Undirsíður

Skyld svör

Önnur svör

Svör sem birt voru í sama mánuði

Sköpunarsagan og aldur alheimsins

Grétar Einarsson spyr:

Ef sköpunarsaga biblíunnar er rétt og sönn, hvað má þá áætla um aldur alheimsins út frá henni?

Komdu sæll Grétar.

Eru þessar hendingar sannar?

Blessuð sólin elskar allt,
allt með kossi vekur,
haginn grænn og hjarnið kalt
hennar ástum tekur.

Geislar hennar út um allt
eitt og sama skrifa
á hagann grænan, hjarnið kalt.
„Himneskt er að lifa!“

Ekki getur glóandi helíumhnöttur elskað, hvað þá kysst. Ekki getur haginn grænn svarað ást sólar? Enginn hefur séð skrifað á hagann grænan: Himneskt er að lifa.

En er þetta kannski samt satt? Ljóðræn tjáning um mikilvægi sólarinnar og þá gleði sem hún veitir.

Í Biblíunni eru margs konar textar sem eru ólíkir að eðli til. Við lesum t.d. ekki fréttablað, skáldverk, símaskrána og ljóðabók sem sams konar texta.

Sköpunarsagan er að mati flestra guðfræðinga (sbr. ritling dr. Þóris Kr. Þórðarsonar, Sköpunarsagan í fyrstu Mísebók, ný viðhorf) ljóðræn tjáning um Guð sem skapara og almætti hans og að allt sé frá homum komið og harla gott. Sköpunarsagan er ekki raunvísindaleg skýrsla almættisins, enda Biblían ekki raunvísindarit, heldur trúarrit sem fyrst og fremst er beinir sjónum að Guði og gerðum hans og notar víða til þess myndmál, rétt eins og skáldið í "Blessuð sólin". Samkvæmt þessu verður ekkert ætlað um aldur heimsins út fré henni.

Kveðja,
Sigurður

19/9 2005 · Skoðað 3242 sinnum

Ummæli frá lesendum

Davíð Örn Sveinbjörnsson skrifar:
Þó að sköpunarsagan sé ljóðræn tjáning segir það ekkert um það hvort að verið sé að nota myndmál eða raunhæfa lýsingu? Davíðssálmarnir eiga margir hverjir við sögulegar staðreyndir að styðjast margir vilja meina að ýmsir þeirra séu spádómar, það hafa fáir reynt að draga úr sannleiksgildi þeirra eða beina sjónum að því að einungis sé verið að upphefja Guð, með því að bendla þá við ljóðræna tjáningu. Þessvegna finnst mér lítið úr sköpunarsögunni gert með þessu svari af hverju ekki að segja: "að ekki sé vitað hvað var meint með þessu, en að ýmsir halda því fram að áhersla sköpunarsögunnar sé á skaparann en ekki hvernig sköpuninn varð til raunvísindalega og að það sé þá í eðlilegu samhengi við margt í Biblíunni" Ekki blanda ljóðrænu dóti við, það skiptir ekki máli! Ljóðræn tjáning segir lítið um tilganginn eða sannleiksgildi efnisins því ljóð geta borið staðreyndir og sögur, og bera margar íslenskar fornsögur þess merki að þær lýstu einhverjum atburðum í ljóðrænu(vísur) formi, og vísur sem ýmsir Íslendingar hafa samið segja oft frá atburðum sem urðu, það að þeim er lýst í vísuformi hefur ekkert með atburðinn eða lýsinguna að gera og eitt og sér dregur ekki úr sannleiksgildi efnisins. Takk fyrir

Langar þig að bera fram spurningu? Gerðu það þá hér.

Þín ummæli

Forsíða · Skoða svarflokka · Höfundar · Leit