Hvað finnst ykkur um kynlíf fyrir hjónaband?

Þjóðkirkjan hefur enga eina skoðun á kynlífi fyrir hjónaband.

Það sem allt kristið fólk er sammála um, er það að mannleg samskipti eiga að einkennast af gagnkvæmri virðingu og réttlæti.

Við erum kynverur allt okkar líf og lifum í þeim skilningi kynlífi frá þeim tíma er kynhvötin gerir vart við sig hjá okkur hverju og einu.

Við trúum því að Guð hafi gefið okkur líkamann með öllum sínum undrum (Davíðssálmur 139) og með líkamanum getum við tjáð okkur á svo margvíslegan hátt. Við tjáum reiði og gleði með líkamanum. Við tjáum ótta og ást, umhyggju og hatur, forvitni og fálæti og endalaust litróf fleiri tilfinninga með líkama okkar.

Aðalatriði kynlífs er ekki hvenær það fer fram, eða við hvaða félagslegu aðstæður. Það er ekki aðal atriðið. Margir hafa talað um hjónabandið eins og það væri hinn öruggi staður fyrir hið dýrslega eðli manneskjunnar. Það finnst mér ömurleg hugmynd. Það er ekki rétt að hugsa um kynhvötina sem eitthvert náttúruafl sem verði með öllum ráðum að hemja svo að það eyðileggi ekki út frá sér. Kynhvötin er ekki eyðileggjandi afl, líkaminn er ekki vondur og kynlíf er ekki ljótt.

Þess vegna er skynsamlegast að hugsa um kynlíf út frá réttlæti og virðingu. Það er rétt að hugsa um kynlíf í ljósi þeirra stórkostlegu tækifæra sem það gefur til þess að bæta líf okkar og gera samskiptin fallegri. (Jóhannesarguðspjall 13.34).

Vandinn er hinsvegar sá, og því megum við ekki gleyma, að kynferðisleg samskipti fólks geta tjáð allt annað en virðingu og réttlæti. Við getum tjáð reiði í atlotum. Undirokun getur verið inntak kynferðislegra samskipta, m.a.s. inni í hjónaherberginu. Hjónavígsla er engin trygging fyrir réttu kynlífi. (Efesusbréf 4.17-24)

Að ofangreindu má því álykta: Kynlíf án ástar og ábyrgðar er rangt. Kynlíf þar sem manneskjur eru ekki jafningjar er ekki kynlíf, heldur kyndauði. Það er ekki hægt að fullyrða um kynlíf fyrir hjónaband, en það er hægt að fullyrða um klám, um ofbeldiskynlíf, um vændi, og öll form kynferðislegra samskipta þar sem manneskjur nota aðrar manneskjur. Slík kynferðisleg samskipti eru röng og eru ekkert kynlíf. Kynlíf elskenda er tjáning á gagnkvæmri virðingu, réttlæti og ást.

Bjarni Karlsson, sóknarprestur í Laugarneskirkju