Ef að Biblían er ekki ómengaður boðskapur guðs hvernig er þá hægt að greina á milli hans og mannlegan boðskap?

Biblían er ómengaður boðskapur Guðs. En eins og að ofan segir þá er hún margræð, af því að sá Guð sem talar í Biblíunni talar til manna og höfðar til manneskjunnar allrar. Röddin sem talar í Biblíunni er persónuleg rödd sem talar ekki í formúlum heldur á marga mismunandi vegu. Lykillinn til skilnings er trúin og bænin í Jesú nafni. Trúarlíf kirkjunnar er íhugun orðsins og lífsins í samfylgd með Kristi, sem er "orð lífsins." Eins og lærisveinarnir á leið til Emmaus að kvöldi páskadags (Lúk.24.13-35). Þar lauk Kristur upp ritningunum svo að ljós orðsins helga lýsti upp veginn.

Það sem við lesum í Biblíunni lýkst upp, ef við leyfum okkur að hlusta í auðmýkt og trú, hlusta á röddina sem talar í orðinu, leyfum okkur að færast Kristi nær, elska hann heitar, líkjast honum meir. Ef við leyfum okkur að þekkja röddina bak við orðin. Það er í samhengi hinnar helgu iðkunar sem augun ljúkast upp og hjartað sér. Mikilvægara en að lesa Biblíuna er að biðja hana. Þá færist textinn frá höfði til hjartans, þar er hún ekki aðeins uppspretta hugmynda, heldur veitir þar mynstur og mátt til að lifa.