Ég hef verið að hugsa afhverju Páskar heita páskar, afhverju skírdagur heitir skírdagur og afhverju Föstudagurinn langi heitir föstudagurinn langi?

Það væri æðislegt ef þú/þið vissuð það. ég er á fermingarári og þarf að gera ritgerð um þetta, en ég finn engar upplýsingar um þetta!

Kær kveðja, Hanna

Sæl Hanna.

Þessi spurning gæti kallað á langa ritgerð og mörg svör en hér koma nokkrar línur um dagana sem þú nefndir.

Páskar eru haldnir til að fagna upprisu Jesú Krists frá dauðum. Orðið páskar er komið úr hebresku en páskar voru hátíð löngu áður en upprisa Jesú átti sér stað og var þá hátíð sem var tengd vorinu og aukinni sólarbirtu.

Eftir upprisu Jesú urðu hinir kristnu páskar til sem við í dag höldum hátíðlega á degi upprisunnar.

Skírdagur er fimmtudagurinn fyrir páska og þá er minnst síðustu kvöldmáltíðar Jesú með lærisveinum sínum og í minningu þeirrar máltíðar höfum við kvöldmáltíðarsakramentið eða altarisgöngu eins og við köllum það oft. Orðið skír merkir hreinn og að skíra merkir að hreinsa.

Af hverju hann er kallaður skír – dagur tengist meðal annars mjög gamalli hefð í kirkjunni að hreinsað var af altarinu t.d. var dúkurinn sem er á altarinu þveginn fyrir páskahátíðina og jafnvel var altarið sjálft þvegið.

Á föstudegi var Jesús krossfestur og er það mesti sorgardagur kristinnar kirkju en ekki er alveg víst af hverju orðið langi kom til.

Við getum hugsað okkur að það vísi til hins langa tíma sem Jesús var píndur á krossinum. Einnig er lýsingarorðið langur stundum notað um eitthvað erfitt. Okkur finnst jú öllum að það sem tengist þjáningu og sorg gerir dagana dökka og langa.

Heimildir: Saga daganna e. Árna Björnsson Mál og menning 1993.

Vonandi kemur þetta svar þér eitthvað á sporið og gangi þér vel að gera ritgerðina.

Bestu kveðjur,
Irma Sjöfn