Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Arna Ýrr Sigurðardóttir

Aftur til framtíðar

23. janúar 2013

Fyrir 24 árum síðan fór ég á Biblíuskóla. Svokallað Discipleship Training School á vegum Youth With a Mission, á Eyjólfsstöðum á Héraði. Ég ákvað þetta því að mig langaði að læra meira um Guð, um það að vera lærisveinn hans og ganga með honum. Ég dvaldi ásamt góðum hópi fólks á Eyjólfsstöðum í 3 mánuði og stúderaði Biblíuna, lærði ýmislegt um Guð og enn meira um sjálfa mig. Eftir skólann tók við 2 mánaða boðunarferð, sem er alltaf hluti af þessum námskeiðum. Það var ákveðið að fara í boðunarferð til Akureyrar, sem var heimabær nokkurra okkar sem vorum í skólanum. Við dvöldum á Akureyri, gistum í kristniboðshúsinu Síon, og, merkilegt nokk, þá var starfsstöðin okkar Glerárkirkja. Þá var þar sóknarprestur sr. Pétur Þórarinsson, og hann tók okkur og okkar framlagi inn í kirkjustarfið fagnandi. Við héldum samkomur undir yfirskriftinni„Ný dögun” auk þess sem við komum að unglingastarfi.

Það er sérstök tilviljun (nema það sé bara engin tilviljun!) að nú er staddur boðunarhópur í Glerárkirkju frá sömu samtökum. Eins kom hingað hópur fyrir tveimur árum, þannig að þetta er í þriðja skiptið sem Glerárkirkja nýtur krafta YWAM í kirkjustarfinu. Nú er ég orðin prestur í Glerárkirkju og við hér njótum þess að hafa hér frábæran hóp ungmenna frá Montana sem aðstoðar okkur í starfinu, þau taka þátt í fermingarfræðslunni með dansi, söng, leikjum og vitnisburðum. Svo ætla þau að vera með okkur í messu á sunnudaginn, og á föstudagskvöldið kemur (25. janúar) verður samkoma hér í kirkjunni, sem þau leiða.

Það er mikil blessun að fá að njóta krafta sjálfboðaliða í kirkjustarfinu. Bæði þeirra sem sýna trúfesti gagnvart kirkjunni sinni og koma hér sunnudag eftir sunnudag til að leggja hönd á plóg, en líka þeirra sem eru tilbúin að leggja á sig langt ferðalag, til lands sem þau þekkja ekki neitt, og nota bæði sinn eigin tíma og fjármagn í það að verða öðrum blessun og uppörvun. Við í Glerárkirkju erum þakklát fyrir allt þetta góða fólk og biðjum Guð að blessa líf þeirra og starf.

Um höfundinn

Allur réttur áskilinn © 2000-2017 Höfundar og þjóðkirkjan. Flettingar 1898.


Pistlar
Postilla
Almanak
Spurningar