Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Sigurður Árni Þórðarson

Hvernig er ferðasagan?

9. ágúst 2011

Ferðasögur. Mynd: Sigurður Árni Þórðarson


Hvernig var sumarfríið þitt? Svörin eru mismunandi. Margir gretta sig og svara: „Svona lala“ eða „allt í lagi“ en bæta svo við: „Bíllinn bilaði, kortinu var stolið. Það rigndi allan tímann og þjónustan, sem við áttum að fá var því miður ótrúlega léleg. Ferðafélagarnir voru hávaðasamir og sneru sólarhringnum alveg við. Það er nú bara gott að vera kominn heim!“ Upplífgandi og spennandi? Nei, en margar ferðasögur eru á þessa leið og eiginlega dapurlegar hrakfallasögur. Segja þær bara ferðasögu eða eitthvað annað – kannski um ferðalanginn sjálfan?



Svo eru hin, sem segja töfrandi undrasögur, sem fylla eyrun af músík, 
nefið af lykt og hugann af fögnuði: „Þetta var dásamleg ferð, við upplifðum 
svo margt. Landslagið var heillandi. Ljósaskiptin voru hrífandi, dans skugga og sólstafa með ólíkindum. Lyktin var þrungin og skerpti ímyndunaraflið. Við fundum þessi fínu veitingahús og ég hlakka til að nota kryddið sem ég keypti.” Hefur þú heyrt svona sögur, sem kitla huga og laða fram tilfinningar? Hverjir megna að segja svo heillandi frá? Hvað segja svona ferðasögur um förumanninn jákvæða?


Ferðasögur fólks eru ekki aðeins um Ítalíu, Þórsmörk eða Prag. Þær eru fremur frásögur eða túlkun á afstöðu og lífi sögumanna. Fólk, sem segir frá litríkum ævintýrum og getur jafnvel séð í illviðri tilefni til heilabrota, er fólkið sem er tilbúið til að opna og upplifa á dýptina. Þetta fólk er ekki fullkomið og lendir í sorgum eins og aðrir. Það verður fyrir sjúkdómum, þjáist og missir ástvini sína í dauðann eins og við hin.

En það hefur í sér þá getu og þjálfun, að geta séð skínandi perlur á sorgarhafsbotni, ljósbrot í myrkri, augnablikshamingju í hremmingum, greint hið hlálega í grafalvarlegum aðstæðum og numið hið dýrlega í veröldinni. Þau, sem segja bara sorglegar ferðasögur tjá oft fremur depurð eigin lífs en óhöpp farinnar ferðar. Sorgarsögur þarf auðvitað að segja og depurð þarf að tjá. En sálarháski leysist ekki með sorglegri ferðasögu! 


Svo hefur Guð líka sagt merkilega sögu um sig. Ferðasaga Guðs er ekki um lélegt hótel Jörð, töpuð greiðslukort og leiðinlega ferðafélaga, heldur um að lífið er litríkt ástarævintýri, vonbjart og fullt af ævintýrum og furðum til að gleðjast yfir. Helgisaga Biblíunnar er lykilsaga um og fyrir alla. Hún tjáir, að lífið er sterkara en dauðinn og ástin sterkari en hatrið. Guð segir þér ferðasögu sína og heimsins til að þú vitir hver Guð er. Í þeirri sögu Guðs ganga svo upp allar smásögur okkar.

Getur verið að saga úr fríi sé gluggi að líðan og lífi þínu? Hvernig er annars ferðasaga þín? Segðu hana gjarnan því hún segir margt um hver þú ert. Hvernig var annars sumarfríið þitt?

Um höfundinn

Viðbrögð

Allur réttur áskilinn © 2000-2017 Höfundar og þjóðkirkjan. Flettingar 2472.


Pistlar
Postilla
Almanak
Spurningar