Trúin og lífið
Lífið og tilveran

Skyldar færslur



Leita

Nína Björg Vilhelmsdóttir

Djáknar!

Í kirkjunni starfar stór og ólíkur hópur einstaklinga. Þar eru bæði leikmenn og lærðir. Organistar, sjálfboðaliðar, biskupar, djáknar, kirkjuverðir, prestar og ræstingarfólk svo eitthvað sé nefnt. Verkefnin eru æði mörg og misjöfn, sum hafa verið unnin í kirkjunni í langan tíma en önnur eru nýrri og hafa sprottið upp af þörf. Þar á meðal er staða djáknans.
Flestir djáknar á Íslandi starfa ýmist á stofnun eða í kirkjum landsins. Starf þeirra er kærleiksþjónusta, diakonia. Kærleiksþjónustan er eitt af kjarnaatriðum kristindómsins og byggir á helgihaldi kirkjunnar, helgihaldi sem mótast af orðum og verkum kærleiksþjónustunnar. Með réttu má því segja að kærleiksþjónustan sé framlengdur armur lofgjörðarinnar inn í hversdaginn. Kærleiksþjónustunni er oft skipt upp í tvennt til einföldunar, þ.e. líknarþjónusta og fræðsluþjónusta. Allt starf djáknans miðar að því að vera með einstaklingnum í hinu hversdaglega, því sem mætir viðkomandi á hverjum degi, gleði og sorg. Margir djáknar starfa með börnum í kirkjunni.
Það er mikil blessun að fá að fylgjast með þeim vexti sem víða hefur orðið í barnastarfi kirkjunnar og einnig í trúarþroska barnanna sem mörg hver hafa sótt starf í kirkjunni í yfir 10 ár. Biskup Íslands hefur lagt ríka áherslu á það að hlúa vel að ungviði landsins og hann hefur jafnframt hvatt sóknarnefndir kirknanna að forðast það í lengstu lög að skera niður í barna- og æskulýðsstarfi. Vegna orða biskups sem og þeirri staðreynd að starf djákna, diakonian, er mikilvæg í okkar ágæta samfélagi hryggir það mig að heyra af uppsögnum djákna og þvi að verið sé að leggja niður stöður djákna.
Kærleiksþjónustan, diakonian, er einn af lykilþáttum kirkjunnar eins og kemur fram í yfirskrift Þjóðkirkjunnar: Þjóðkirkjan, biðjandi, boðandi, þjónandi. Hlutverkin innan kirkjunnar eru ólík og æði misjöfn eins og ég sagði hér í byrjun. Djáknar eru kallaðir til að sinna ákveðnum verkefnum, organistar öðrum og prestar enn öðrum. Það mikilvæga er að allir þekki sitt starfssvið og vinni saman að því sem skiptir mestu máli, að boða, biðja og þjóna.
Kærleiksþjónustan er mikilvæg í dag og djáknar eru kallaðir til að sinna henni. Ég tel að með því að leggja niður embætti djákna sem og með uppsögnum þeirra sé kirkjan að stíga óheillaskref, ekki síst fyrir þá sem nýta sér þjónustu djákna.

Um höfundinn



3 viðbrögð við “Djáknar!”

  1. Pétur Björgvin Þorsteinsson skrifar:

    Takk fyrir þennan pistil Nína. Það er mikilvægt að djáknar láti heyra í sér sem og starfsfólk kirkjunnar allt. Þá er lofsvert að formaður Djáknafélagsins sýni þar gott fordæmi. Því miður er staðan sú eins og þú lýsir að þó nokkrir söfnuðir innan þjóðkirkjunnar sem og stofnanir sem hafa nýtt sér þjónustu djákna í gegnum árin velja nú að segja upp djáknum, minnka við þá starfshlutföll eða jafnvel að leggja niður djáknastöðurnar sem til voru. Ég tek undir orð þín að það er óheillaskref og vonandi bara um tímabundna fjárhagsörðugleika að ræða.

  2. Eygló Jóna Gunnarsdóttir skrifar:

    Takk Nína Björg fyrir þennan pistil, gott að vekja athygli á þessu. Kirkjan mín hefur t.d. ekki efni á að hafa djákna eftir að ég komst á aldur og hætti í maí. Vonandi á ástandið eftir að batna hjá kirkjunni svo að hún geti haldið þjónustu djákna.

  3. Ragnheiður Sverrisdóttir skrifar:

    Þetta er frábært framtak, Nína!! Takk fyrir. Það er baráttuhugur í okkur djáknum og við þurfum að sýna hann opið og hvetja til umræðu. Djáknar eru ein starfstétt í kirkjunni en þær eru margar. Getum við litið á heildina - kirkjuna sem heild og staðið saman öll sem eitt? En að sjálfsögðu horfum við á málin út frá okkar sjónarhorni - Hvers þörfnumst við? Hvers þarfnast kirkjan? Hvert er eðli kirkjunnar? Við höfum barist fyrir aukinni kærleiksþjónustu í kirkjunni og okkur hefur orðið ágengt. Kirkjan er ekki heil án kærleiksþjónustu. Heil og heilbrigð kirkja verður að leggja áherslu á að þjóna náunganum - þar vilja djáknar vera í broddi fylkingar.

Allur réttur áskilinn © 2000-2006 Þjóðkirkjan. Flettingar 4086.


Pistlar
Postilla
Almanak
Spurningar