Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Sigurður Árni Þórðarson

Flott hjá þér

22. mars 2011

Ólafur Þorsteinsson afreksmaður úr Vesturbænum

Fjölskylda mín fór fyrir skömmu til Ameríku. Við lentum í Seattle og ég átti von á hefðbundinni stórflugvallafýlu starfsmanna, sem tækju út pirring sinn á okkur ferðalöngum. Nei, ónei. Elskulegt fólk mætti þreyttum útlendingum. Einn sagði með hlýju í augum “verið velkomin” og annar sagði “njótið verunnar í Bandaríkjunum.” Takk, þetta var óvænt móttaka. Smáfólkið fékk líka sinn skammt, “fínn hattur” og “falleg peysa.” Jákvæðnin var skýr og almenn.

Svo héldum við áfram og enduðum suður við landamæri Mexíkó og bleyttum tærnar í Kyrrahafinu. Herra Fúll og frú Fýla virtust gersamlega týnd. Var eitthvað að? Fólk hafði getu til að sjá, virða og hrósa. Jafnvel í atinu í Disneylandi og Legolandi tjáðu vandalausir ef eitthvað hreif. Svo vorum við boðin inn á heimili vina okkar og eflingarorðin flugu.

Þessi áberandi jákvæðni og hrós urðu mér íhugunarefni. Síðustu mánuði hafa fréttatímarnir verið samfeldur rosi, traust hefur trosnað og Fúll á móti farið hamförum. En þó margt sé okkur mótdrægt er óþarfi að temja sér nábít í tengslum við fólk. Börnin hafa þörf fyrir að við sjáum þau og við bregðumst við þegar þau gera vel og vinna sigra í smáu eða stóru. Nábíturinn á ekki heldur að stjórna atvinnulífi, stofnunum og þmt. fjölmiðlum. Við megum og þurfum að tjá fólki, að það og verk þess veki hrifningu og gleði. Maki þinn þarfnast að þú sjáir hann og bregðist við með jákvæðum hætti. Fólk við búðarkassa tekur jafnan vel við þegar hlý orð falla í þess garð.

Hrós varðar ekki málæði og yfirborðstjáningu, heldur að temja sér ákveðna afstöðu til annarra. Fólk er dýrmæti og þannig skapað. Allir þarfnast orða. Við lifum í krafti tengsla, höfum þörf fyrir að vera séð, að lífshættir, hæfileikar, eigindir og verk séu færð í tal.

Öllum verður gott af því, sem hefur verið kallað H-vítamín – hrós. Það er trúverðug lífsleikni að næra aðra með orðum þegar vert er og ástæða til. Æfðu þig og temdu þér að strjúka með orðum. Slíkt atferli og tjáning er smitandi og samfélagseflandi. H-ið vinnur á öllum gerðum af nábít og jafnvel Fúll og Fýla skána. Verið velkomin. Þú ert flott og frábær! Er einhver nálægt þér, sem þarfnast þess að heyra það líka? Blóm dagsins er hrós.

Um höfundinn



5 viðbrögð við “Flott hjá þér”

  1. Árni Svanur Daníelsson skrifar:

    Hrós er lífgjafi. Takk fyrir pistilinn.

  2. Sigrún Óskarsdóttir skrifar:

    Þú ert flottur Sigurður Árni:) takk fyrir pistilinn!

  3. Guðmundur Pálsson læknir skrifar:

    Hrósið er gott og rósemdarleg eftirtekt og jákvæðni.

    Það er eftirtektarvert í góðri frásögn þinni Sigurður Árni að maður skynjar þetta mjög vel þegar maður fer utan og skyggnist út fyrir hugarheim íslenskra fjölmiðla.

    Mér finnst fólk sem ég tala við yfirleitt hemja neikvæðni sína og halda í vonina, segja sisona, “þetta lagast”, og það er mjög virðingarvert.

    Hinsvegar eru fjölmiðlarnir margir eins og kvalræðis-fabrikkur. Þó ekki K-vítamín, því það er annað.

  4. Arnfríður Guðmundsdóttir skrifar:

    Takk fyrir þessa vítamínsprautu með morgunmatnum!

  5. Guðný Kristjánsdóttir skrifar:

    Góð og mikilvæg orð, var hugsað til fyrrverandi mannsins míns, sem er ekki meðal okkar lengur nema í minningunni um góðan dreng. Ef hann mætti afgreiðslufólki sem honum fannst fýlt spurði hann: “Færð þú borgað fyrir að vera súr”? Hann gat sagt svona því hann var nær 2ja metra langur og horfði á fólk fyrir ofan efri gleraugnakantinn með bros í augum.

Allur réttur áskilinn © 2000-2017 Höfundar og þjóðkirkjan. Flettingar 3136.


Pistlar
Postilla
Almanak
Spurningar