Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Sigurður Árni Þórðarson

Á

8. mars 2011

Við veiði

Vatn er dýrmæti. Lífið skírist í vatni. Vatn verður ekki aðeins metið til peninga – ekki frekar en lífið sjálft. Jafnvel í köldu Þingvallavatni lifa um 120 þúsund lífverur á hverjum fermetra við vatnsbakka. Það er heilt samfélag á litlum bletti og í stóru samhengi. Það lífríki er verðmætt. Göngumst við ríkidæminu og ábyrgð okkar. Gerum vatnalífi landsins gott til með fræðslu, gestastofum, almennri menntun um lífið í vatninu. Já, verndum vatnið hæfilega.

Fyrir nokkrum árum kom ég í safn í Vestur-Noregi, sem helgað er lífinu í merkilegri laxá. Þegar inn var komið var þar ekki aðeins miðlað upplýsingum um ofurfiska, sögu veiða og árnýtingar, heldur var sem einn hluti árinnar rynni í gegnum húsið.

Eins og í góðum vatna- og sjávarlífs-söfnum erlendis var hægt að ganga að stórum sýnisgluggum. Þeir veittu innsýn beint í hylinn.

Þar syntu árbúarnir og hægt var að fylgjast með gerð, stærð, hreyfingum og samskiptum fiskanna. Þetta var heillandi safn og ég hugsaði með mér: Góð hugmynd fyrir fólk, sem metur vatnið og lífið mikils – frábær hugmynd fyrir Árnesinga.

Gullhringurinn – Þingvellir, Gullfoss, Geysir og Skálholt – er góður en yrði enn betri ef hægt væri í ferðarlok að koma við á Selfossi, skoða stórfiska á leið upp ána og fræðast um dýrmæti og nýtingu vatnsins. Það er ekki aðeins Sogið, sem er fljótið helga.

Allt vatn og líf þess er gott og við erum vörslumenn þess. Ekki er verra að fiskur í kristninni er tákn hins heilaga. Er ekki tími til kominn, að Árnesingar gangist við ríkidæmi sínu, byggi laxastofu og opni fjársjóðskistu vatnaheims héraðsins. Gullið má sýna. Árborg yrði bara betri með árstofu – nútímalegu Árnesi.

Um höfundinn



2 viðbrögð við “Á”

  1. Árni Svanur Daníelsson skrifar:

    Takk fyrir vatnspistil.

    Það er gott að vera minnt á mikilvægi vatnsins. Heimsráð kirkna beinir einmitt sjónum að vatninu á föstunni - sjö vatnsvikur eru framundan http://www.oikoumene.org/en/activities/ewn-home/resources-and-links/seven-weeks-for-water.html

  2. Pétur Pétursson skrifar:

    Góður pistill. Skuldbindur skírnin ekki kristið fók - kirkjuna - til að standa vörð um hreint, tært og rennandi vatn? Ég er stoltur af prestinum mínum fyrir frumleik og áræðni í boðun og túlkun. kkv pp

Allur réttur áskilinn © 2000-2017 Höfundar og þjóðkirkjan. Flettingar 2369.


Pistlar
Postilla
Almanak
Spurningar