Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Sigurður Árni Þórðarson

Skálholtsjárnið

11. janúar 2011

Skálholtskirkja

Skálholt hrífur og miðlar sögum til skemmtunar og eflingar. Fyrir helgi var ég á ráðstefnu eystra og naut töfra staðarins. Kirkjan gnæfði yfir land og líf og skein eins og perla í næturhafi vetrarins. Hún tók elskulega á móti öllum, sem sóttu tíðir, og Kristur opnaði fang sitt í kórnum.

Þegar ég horfði á þetta fallega hús kom upp í hugann saga frá byggingartíma kirkjunnar. Járnið, sem sent var austur, var kolryðgað og ljóst að mikil vinna færi í að bursta það allt upp. Góð ráð voru rándýr og tímafrek. Einhverjir héldu, að járnið væri alveg ónothæft? Víl helltist yfir byggingarliðið. Einn stóð hugsi og vildi ekki lúta ryðráðum. Þegar volandi hópurinn gekk til náða fór hann út, festi járnadræsu aftan í bíl sinn og dró hana síðan eftir malarveginum út að Spóastöðum og til baka.

Næturferðirnar urðu margar eða þar til allt járn hafði farið rúntinn. Ryðið svarfaðist af og málmurinn brosti skínandi bjartur við þeim, sem vöknuðu að morgni og mættu með vírbursta til vinnu. Það var eins og morgunsólin hefði tekið sér bólfestu í járnstæðunni. Burstarnir féllu og burðarvirkið Skálholtskirkju hefur ekki gefið sig. Kirkjan hefur staðist alla skjálfta jarðar og áraun tímans.

Járnsaga kirkjunnar er sem lykilsaga fyrir þjóð á krossgötum. Nú er komið að framtíðargerð Íslands. Getum við notað ryðgað grindarefni, sem nóg er af og margir vilja selja ódýrt? Hrunið opinberaði, að þegar ekki er vandað til verka verða afleiðingar hörmulegar. Við Íslendingar erum í endurskoðunarham og eigum að læra ný trix og hugsa alla möguleika.

Samfélagsdræsurnar eru ekki ónýtar heldur ryðgaðar. Lestir eru ekki byggingarefni og fúsk ekki heldur. Háskólafólkið á tól og ætti fremur að setja þarfir samfélagsins í forgang en að skora á topplistum alheimsakademíunnar. Stjórnsýslu ríkisins þarf að bæta. Auka þarf fagmennsku og gefa vel í svo vinhygli og klíkuræði molni af. Stjórnmálastéttinni og flokkum þarf að skella á mölina til að eðli þeirra verði opinberað og réttlæti þeirra hreinsað. Og svo er það stjórnarskráin. Er hún ryðgaður úrgangshaugur? Getur verið að þar sé ljómandi efni, sem hreinsa þarf, þ.e. ræða vendilega, til að gildi þess sjáist?

Nú skal skíra, meta hvað er heilt, í hverju er burður og hvað getur nýst. Notum hið góða og siðlega. Skálholt er heilagur staður, en stofnanir og stjórnarskrá þurfa á Spóastaðarúntinn!

Um höfundinn



3 viðbrögð við “Skálholtsjárnið”

  1. Fanney Halla Pálsdóttir skrifar:

    Ágæti séra Sigurður

    Ég þakka góða grein þína hér fyrir ofan. Biskup Íslands, herra Karl Sigurbjörnsson, sagði frá í ræðu sinni í Hallgrímskirkju 24. október sl. hvernig við sem þjóð höfðum hugsjón og byggðum okkar samfélag, okkar þjóðfélag á grundvelli þeirrar hugsjónar fyrir 70 árum síðan. Í fjórum litlum setningum greinir hann okkur þar einnig frá óskiptri virðingu sinni og sinnar fjölskyldu, fjölskyldu sem nýtur virðingar öðrum fremur fyrir fagmennsku, fræðimennsku og guðrækilegt líferni, virðingu þeirra fyrir góðum vinnubrögðum óháð formlegri eða óformlegri menntun sem og virðingu þeirra fyrir góðri verkmennntun og óskipta aðdáun 6 ára sonar hans fyrir þeirri virðingu og visku.

    Ég sé á grein þinni og annarra góðra kirkjunnar manna að þið gefið ykkur ekki í gerinu og umrótinu, gefið ykkur ekki hversu hart er sótt að toga ykkur inn í ófagmennsku, yfirborðsmennsku og skyndilausnir. Það að þið hvorki hörfið né gangið í lið með gerinu ætti eitt og sér að geta fært okkur aftur þá virðingu fyrir manninum sem við sem þjóð áttum og byggðum okkar fullveldi og síðan sjálfstæði á.

    Ég vona að ég og við sem höfum aðra aðkomu í þjóðfélaginu náum einnig að halda styrk okkar svo vinna okkar geti farið með ykkar í þessa veru. Ef við náum síðan fjölmiðlum í lið með okkur þá er hálfur sigur unnin.

    Góðar kveðjur,
    Fanney Halla Pálsdóttir

  2. Gunnar Hrosshaga skrifar:

    altaf gaman að sjá hugleiðingar .

  3. Sigurður Árni Þórðarson skrifar:

    Takk fyrir undirtektir, Fanney og Gunnar.

Allur réttur áskilinn © 2000-2017 Höfundar og þjóðkirkjan. Flettingar 2321.


Pistlar
Postilla
Almanak
Spurningar