Trúin og lífið
Pistlar


Undirsíður

Eftir sama höfund

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Sigurður Árni Þórðarson

Mark

25. janúar 2011

7 metros

Skot – og mark. Óp hljóma úr húsum og svo skömmu síðar kveða við harmavein. Þetta er tími hinna stóru drauma en líka vonbrigða. Mörkin raðast inn, en sum skotin eru framhjá. Sigrar eru sætir en töp svíða. Hverjir eru plúsarnir og hverjir mínusarnir?

Handboltalandsliðið á HM nú er líklega besta karlaliðið, sem Íslendingar hafa átt. Ekki að Skaparinn hafi náðarsamlegast ákveðið að úthluta okkur betra efni en var í Gunnlaugi og Geir á sínum tíma. Þjálfun í nútímahandbolta er betri en áður var. Starfsfólkið leggur mikið á sig og heldur uppi móral þegar á móti blæs. Flestir landsliðsmennirnir leika í bestu handboltadeildum og liðum heims. Þeir eru ekki aðeins reknir áfram af þjóðernisrembingi og vöðvaviti, heldur hafa hag af að lið þeirra nái langt. Laun þeirra hækka ef þeir standa sig. Íslenskur handboltajöfur er meðal þeirra best launuðu í heimi.

Tími einkaframtaks er liðinn. Tími fagmennsku og teymisvinnu er kominn. Guðmundur Guðmundsson hefur innleitt aga og sigursæla leikjagreiningu í íslenskan handbolta. Við ættum ekki aðeins að standa með strákunum, heldur læra af þeim. Nútímahandbolti okkar er betri en gamli boltinn vegna fagmennsku í þjálfun, skipulagi og undirbúningi.

Handboltinn er ekki lengur íþrótt einstaklinga þótt ofurmenni séu. Ekki er lengur treyst á heppni, grísa og tilviljanir heldur agaða teymisvinnu. Við ættum að temja okkur sömu hugsun og landsliðið - að vera proffar í því sem við gerum. Gamla snillingablekkingin hefur leikið okkur illa. Leikir tapast og raunsæi er nauðsynlegur förunautur. Gerum okkar besta – í hóp og með með skýrum takmörkum.

Kristnin hefur um allar aldir kennt boltahugsun og marksækni. Til að skýra út fyrir mönnum eðli brota, klúðurs, þ.e. syndar, var notað gríska orðið hamartía í Nýja testamentinu. Það merkir að brenna af, hitta ekki og vera misheppnaður. Þegar menn gera mistök í lífinu hitta menn ekki. Í einkalífinu, í vinnu og í samfélagi klúðrum við stundum málum og skorum ekki. Þá daprast lífslán og lífsgæði skerðast.

HM veitir tilefni til ígrundunar um þjóðarkúltur og lífshætti. Þegar menn skora ekki í afstöðu og samskiptum við aðra menn fer illa. Það er hamartía, skortur á fagmennsku og klúður. Verst er þegar menn halda fram hjá sjálfum sér og tapa þar með tengslum við Guð og lífið. Okkar fólk skorar æ meir í landsleikjum, en hvernig skorar þú í þínum lífsleik?

Um höfundinn



Ein viðbrögð við “Mark”

  1. Fanney Halla Pálsdóttir skrifar:

    Ágæti séra Sigurður

    Ég hef lítt kunnáttu í handbolta sem og hef haft litla aðstöðu og litla hæfileika til að stunda íþróttir en eins og aðrir Íslendingar þá virði ég mjög vinnu okkar landsliðsmanna. Þeirra liðsheild (allir liðsmenn, þjálfarar og aðrir sem tilheyra og stuðla að þeirri liðsheild) leggur áherslu á framsækni og einbeitingu jafnhliða að vinna fyrir styrk hinna liðsmanna. Þegar allir leitast við að vinna á þann hátt (það þarf í slíka liðsheild framsækni og einbeitingu, sterka góða yfirsýn yfir styrk þeirra og þekkingu á að tryggja réttar áherslur, því bestu og sterkustu menn geta orðið undir ef þeir vinna fyrir styrk annarra en enginn fyrir þá) þá fæst hagfelldur árangur.

    Landsliðið okkar og aðrir í sömu stöðu hafa lagt okkur til í mörg ár gott vinnuferli og má sjá það í þjóðfélaginu (þau kerfi sem nú er unnið út frá í þjóðfélaginu hafa ekki þekkingu á að skilja slíkt nema þar sem slíkan styrk vantar alfarið og þá er ekki auðhlaupið að byggja slíkt upp). Á sama hátt hafa allir góðir Íslendingar, sem hvorki hafa formlega stöður né formlega aðkomu, lagt til gott vinnuferli sem sjá má í þjóðfélaginu. Við þurfum alltaf þetta tvennt til að hagfelldur árangur náist. Það hefur einnig verið byggð upp þétt vinna í mörg ár til að finna leiðir til að varpa ljósi á þann góðan styrk og vinnu okkar hér á landi til að sú vinna og styrkur nái að stjórna hér.

    Því er mikill styrkur þegar góðir menn eins og þú, góðir menn í formlegum stöðum í þjóðfélaginu, í grein þinni hér fyrir ofan og grein þinni Skálholtsjárninu varpið ljósi á okkar góða styrk og góða vinnu. Almenningur eins og ég sem höfum ekki formlegar stöður eða formlegan styrk leitumst við að finna áfram leiðir til að okkar góða vinna og góður styrkur fái aukið vægi sem og að við náum formlegum stöðum og/eða styrk til að tryggja þann styrk til frambúðar.

    Góðar kveðjur,

    Fanney Halla Pálsdóttir

Allur réttur áskilinn © 2000-2017 Höfundar og þjóðkirkjan. Flettingar 2317.


Pistlar
Postilla
Almanak
Spurningar