Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Stefán Már Gunnlaugsson

Stóru spurningarnar

4. júní 2010

Teiknað á blað

Klukkan er 6:45 á laugardagsmorgni og ég finn þegar fimm ára sonur minn skríður upp í rúmið til mín með ískaldar tær. Í stað þess að kúra í hlýjunni, þá spyr hann stundarhátt: „Pabbi, af hverju vildi fólkið krossfesta Jesú?“

Við sem uppalendur þá hvetjum við börnin til að spyrja spurninga og leita sér þekkingar. Enginn spurning er vitlaus eða röng – allar spurningar eiga rétt á sér, því hver spurning markar upphaf að nýrri þekkingu og nýjum skilning. Við sem uppalendur þurfum á sama hátt að vera viðbúnir að svara fjölmörgum spurningum sem snerta lífið og tilveruna og þær spurningarnar geta verið um hvað sem er, allt frá því af hverju hafa fuglarnir vængi til hver er Guð.

Þegar stórt er spurt, þá er ekki spurt um stað eða stund. Aðstæðurnar oft öðruvísi maður hafði gert sér í hugarlund og hvatvís hugur barnsins bíður ekki svars. Þarna í fyrstu skímu af nýjum degi í svefnrofanum glímdi ég við eina af stóru spurningum guðfræðinnar. Þannig er það oft með aðstæður okkar í lífinu, þegar okkur er keypt út úr hversdeginum (eða svefninum) fyrirvaralaust að glíma við ýtrustu rök lífsins.

Mér runnu í hug flóknar guðfræðilegar útskýringar sem höfðu svo oft reynst mér gott haldreipi við spurningum sem þessari, en þær áttu ekki við hér þegar spurt var í fyllstu einlægni. Ég velti líka fyrir mér um stund hvers vegna barnið var að velta þessu fyrir sér á meðan aðrar spurningar ættu að vekja hjá því meiri forvitni. Í vandræðum mínum greip ég til dýrmætrar reynslunnar minnugur þess að oftast er spurningin aðalatriðið ekki bara svarið og ég spurði á móti: „Af hverju heldur þú að fólkið hafi krossfest Jesú?“ Það var stutt þögn, en svo svaraði hann glaður í bragði: „Vegna þess að Jesú rústaði búðarmönnunum.“ Í sama mund sveiflaði hann stórum og fallegum krossi sem gömul kona hafði gefið honum. Ég sá fljótt að ég gat ekki keppt við þetta svar – enda svarið rétt, eins rétt og það gat verið fyrir fimm ára gamlan strák.

Eftir sat ég þó með þessa stóru spurningu og þakklátur fróðleiksfúsum syninum velti ég henni fyrir mér það sem eftir var dagsins. Að spyrja og leita svars er viðfangsefni trúarinnar. Trúin veitir svör við stærstu spurningum lífsins – svör sem við finnum ekki annarsstaðar. Þess vegna er svo dýrmætt að dýpka skilningin og trúnna, spyrja og leita svara með bæn og lestri Biblíunnar og þannig vera undirbúin fyrir stóru spurningarnar þegar þær brenna á – hvenær sem það verður.

Um höfundinn



5 viðbrögð við “Stóru spurningarnar”

  1. Steinunn Arnþrúður Björnsdóttir skrifar:

    Góður pistill. Þau kunna að spyrja og leita svar og þú setur það í skemmtilegt og nærandi samhengi.

  2. Sigrún Óskarsdóttir skrifar:

    Takk fyrir pistilinn Stefán Már. Góð blanda: vekjandi, einlægur, skemmtilegur og fræðandi. Við getum svo margt af börnunum lært, gleymum okkur alltof oft í hlutverki fræðarans og missum af gullkornunum sem eru svo dýrmæt.

  3. Matti skrifar:

    Hvaða svör veitir trúin? Er það svar ef það stenst enga skoðun?

    Er það svar ef ég skálda eitthvað upp þegar þú spyrð mig?

    - “Siggi gerði það”.
    Hvaða Siggi.
    - “Siggi ósýnilegi”.

  4. Stefán Már Gunnlaugsson skrifar:

    Góð spurning en svarið við henni hlýtur að mótast af afstöðunni til trúarinnar hjá hverjum og einum.

    En er það ekki svo með stærstu spurningar lífsins að sjaldnast er hægt að byggja svarið við þeim á vísindalegum staðreyndum? Er ekki mikilvægast að við glímum við spurningarnar og leitum svara, jafnvel þó þær vakni að nýju þegar við þroskumst og mætum nýjum aðstæðum?

  5. Matti skrifar:

    > En er það ekki svo með stærstu spurningar lífsins að sjaldnast er hægt að byggja svarið við þeim á vísindalegum staðreyndum?

    Ég veit það ekki, er það svo?

    Svo er ósköp heiðarlegt og gott að svara spurningum stundum á einfaldan hátt: “Ég veit það ekki”.

Allur réttur áskilinn © 2000-2017 Höfundar og þjóðkirkjan. Flettingar 2774.


Pistlar
Postilla
Almanak
Spurningar