Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Halldór Elías Guðmundsson

Von

15. janúar 2010

Það er skrítið að upplifa von í augum íbúa í aðstæðum sem virðast vonlausar. Aðfararnótt miðvikudags lágum við á jörðinni við litla flugbraut í Jacmel, án teppa með ferðatöskur sem kodda og hlustuðum á þúsundir íbúa Haiti sem höfðu misst allt, syngja lofsöngva, biðja, gráta og aðstoða hvort annað burtséð frá litarhafti, stétt eða stöðu. Við höfum notið ótrúlegrar vináttu, gestrisni og samfélags með fólki í erfiðustu aðstæðum sem hægt er að hugsa sér. Það er skrítið að yfirgefa vini í aðstæðum sem þessum en við sem ferðumst hér saman erum meðvituð um að vera okkar hér núna er byrði á góðum vinum sem eiga mikið verk fyrir höndum.

Við gerum best með því að halda heim og kalla eftir stuðningi allra sem við þekkjum í því risavaxna verkefni sem er framundan hér í Haiti. Hvenær við komumst héðan er þó enn óvíst en vegurinn frá Jacmel þar sem við höldum til er enn ófær.

Það eru margar leiðir til að koma aðstoð til Haiti. Hægt er að hringja í hjálparsíma Rauða Krossins eða Hjálparstarfs kirkjunnar, senda framlag til SOS barnaþorpa, UNICEF er með mikið starf hér og Barnaheill. Síðustu tvo sólarhringa hefur líf mitt bókstaflega verið í höndum frábærra einstaklinga sem starfa fyrir Haiti Timoun Foundation (http://www.hopeinhaiti.org/). Ef til vill viltu treysta þeim fyrir framlagi þínu.
Íbúar Haiti þurfa á þér að halda núna. Finndu einhvern sem þú treystir til að koma þínu framlagi þangað sem það nýtist best.

Halldór Elías Guðmundsson djákni var staddur á Haiti ásamt hópi guðfræðinema frá háskóla í Ohio þegar jarðskjálftinn reið þar yfir.

Um höfundinn



4 viðbrögð við “Von”

  1. Gunnþór Ingason skrifar:

    Jarðskjálfti og viðlíka hamfarir eru ólýsanlegar skelfingar. Frásögn sem þessi færir þær nær vitund og samvisku. Guð gefi líknandi hendur og kærleiksþel til að styrkja og hugga. Minnumst þess að náungi okkar er hver og einn í neyð nær og fjær sem liðsinna má með einhverjum hætti. Leggjum því hjálparstarfi lið.

  2. Olga Clausen skrifar:

    Kveðja til ykkar allra sem bíðið eftir að komast heim.Vona að ferðalagið ykkar gangi vel þegar að því kemur. Þessar hörmungar víkja ekki úr huga mér. Hjarta mitt er hjá fólkinu sem þjáist á Haítí.
    Kv.Olga

  3. Böðvar Björgvinsson skrifar:

    Takk fyrir þessa grein, Elli. Þeir eru margir sem biðja fyrir ykkur og öllu fólkinu á Haiti þessa dagana, en það er ástæða til þess að hvetja fólk enn meir til þess að biðja og styrkja hjálparstarfið eins og menn geta með framlögum.

    Kær kveðja.

    Böðvar

  4. Ragnheiður Sverrisdóttir skrifar:

    Þetta er mikil lífsreynsla sem hlýtur að fylgja manni alla ævi. Ég horfi í kringum mig þar sem ég bý og þar sem ég vinn og hugsa: Hvernig liti lífið út hér ef allt hrindi í jarðskjálfta? Nei, þessi hugsun er mér ofviða… en það hlyti að líta út eins og göturnar á Haiti sem við sjáum myndir af. Skelfilegra en orð fá líst. Það eina sem hægt er að segja eða stynja upp er: Drottinn. miskunna þú oss öllum íbúum þessarar jarðar.

Allur réttur áskilinn © 2000-2018 Höfundar og þjóðkirkjan. Flettingar 5864.


Pistlar
Postilla
Almanak
Spurningar