Kærleiksþjónustan er ekki bara valkostur heldur mikilvægur þáttur í lífi hvers kristins manns.
Allt kristið fólk er kallað í skírninni til að lifa sem þjónar kærleikans með gjörðum sínum og lífsmáta í heiminum. Þetta hefst sem skilyrðislaus þjónusta við náungann í neyð hans.
Í bréfi Lútherska heimssambandsins frá árinu 2003 er undirstrikuð sú staðreynd að kærleiksþjónusta sé kjarni fagnaðarerindisins og því miðlægt hugtak til skilnings á eðli kirkjunnar.

Kærleiksþjónustan á sér fyrirmynd í dæmisögum Biblíunnar, hana er m.a. að finna í frásögninni um miskunnsama samverjann í Lúkasarguðspjalli. Þar segir frá því þegar samverjinn hlúði að meðbróður sínum, særða manninum, sem aðrir höfðu gengið fram hjá og ekki haft tíma til að sinna. Í frásögninni er okkur, þér og mér enn í dag sagt að gera slíkt hið sama, fara og finna þau sem þarfnast kærleiksríkrar umönnunar og gefa þeim athygli, tíma og umhyggju, án þess þó að gleyma okkar eigin þörfum. Við eigum sem kristnir eintaklingar að hjálpa náunga okkar hver og hvar sem hann er  með nærveru og bæn og með því að byggja brýr til þeirra sem geta orðið að liði til dæmis til þeirra sem sinna löggæslu,  heilbrigðis- eða félagsþjónustu sem og til sjálfboðaliða, sem af elsku og óeigingirni gefa af tíma sínum öllum þeim sem eru í þörf.

Kirkjan hefur veitt kærleiksþjónustu frá upphafi – og verið virk í því að koma til móts við fólk í daglegu lífi þess, hún hefur látið sig varða velferð samferðarfólks. Í þjónustu sinni vitnar kirkjan um veruleika Guðs sem birtist í Kristi hvort sem þjónustan er fyrir þjóðfélagið í heild eða liður í uppbyggingu innra starfs kirkjunnar. Í lifandi kirkju er þjónusta við náungann mikilvægur þáttur. Þannig segir hr. Karl Sigurbjörnsso, biskup í hirðisbréfi til íslensku kirkjunnar, Í birtu náðarinnar:
“ Guðsþjónusta, fræðsla og kærleiksþjónusta eru meginstoðir safnaðarstarfsins í biðjandi, boðandi og þjónandi kirkju. – Sérhver söfnuður þarf að vera samtök um vakandi umhyggju til verndar og heilla lífi mannsins á ólíkum skeiðum þess. “
 
Í stefnu og starfsáætlun kirkjunnar 2004 – 2010 segir m.a. :
“  Með kærleiksþjónustu er átt við það hlutverk kirkjunnar að bera umhyggju fyrir náunganum og koma honum til hjálpar. Markmiðið er að þjónustan birti kristna trú og kærleika í verki. Kirkjan þarf að hlusta eftir þörfinni og leita þeirra sem helst þarfnast umhyggju og stuðnings.”

Í Eyjafjarðarprófastdæmi hefur kærleiksþjónusta kirkjunnar eflst mikið á síðustu 10 árum, má þar  nefna Vinaheimsóknir,  en þar er markmiðið að heimsækja aldraða,  rjúfa einangrun og glæða von. Fastur starfsmaður sinnir þjónustunni og hefur fjölda sjálfboðaliða sér við hlið.
Þjónusta á sjúkrahúsi og öldrunarstofnunum er til staðar, farið er í fangelsi, til langveikra og áfallahjálp veitt svo og eftirfylgd til syrgjenda svo eitthvað sé nefnt. Kærleiksþjónusta við börn og unglinga svo og foreldra er einnig mikil.

Þann 2. febrúar n.k. verður haldið Málþing um kærleiksþjónustu í Eyjafjarðarprófastdæmi. Þar verður staða og hlutverk kærleiksþjónustunnar greind og framtíðasýn mótuð. Þar verða einnig innlegg af vettvangi, frá hjálparstarfi kirkjunnar og fjölskylduþjónustu hennar. ( Sjá nánar auglýsingu á vef Eyjafjarðarprófastdæmis. )

Málþingið verður 2. febrúar frá kl. 13. 00 – 17. 00
í Safnaðarheimili Akureyrarkirkju og er öllum opið.

Um höfundinn