Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Úlfar Guðmundsson

Friður á jörðu og velþóknun yfir mönnunum

21. desember 2006

Söngur englanna á jólanóttina.  „Friður á jörðu.“  Síðan eru liðin tvö árþúsund en því miður erum við langt frá þessu marki.

Menn tala gjarnan um myrkar miðaldir og hafa það í flimtingum að kirkjunni sé um myrkrið að kenna.  Því fer þó fjarri og sannlega var ljós kirkjunnar oft það eina sem sást á miðöldum.  Varla hefur nokkur öld verið myrkari í heimi hér en sú sem síðast leið.  Reynt hefur verið að tengja trúarbrögð og styrjaldir  og hafa vantrúaðir verið þar framarlega í flokki.  Vissulega virðist það stundum við fyrstu sýn en ef betur er að gáð sýnir sig að ýmis konar veraldlegir og pólitískir hagsmunir eru undirrótin miklu fremur en trúarbrögð.

Nú á dögum hafa Íslendingar  skoðað hver aðild þeirra sé að styrjöldinni í Írak.  Það er gott að hugsa um það og einsýnt er fyrir okkur þessa litlu þjóð að best er fyrir okkur í framtíð að taka okkur stöðu friðarmegin.  Það hafði biskup Þjóðkirkjunnar og fleiri  kirkjuleiðtogar áréttað áður en haldið var af stað.

Enn ber það til um þessar mundir að heimurinn sem Guð elskar, mannkynið sem hann vill lækna og frelsa, býr við öryggisleysi, ótta og ófrið.  Jú þannig var það hjá Jósef og Maríu.  Þau gengu til Betlehem við erfiðar aðstæður.  Enn er það svo þrátt fyrir alla okkar velmegun þá hefur desember að þessu sinni fært okkur slys og sorgir. Það er okkur enn hvatning til að huga að boðorðinu:  „Þú skalt ekki mann deyða“  og hrinda í framkvæmd þeim vegabótum sem nauðsynlegar eru til að koma í veg fyrir alvarleg slys.  Sannlega biðjum við þess einnig að jólaljósið lýsi alls staðar hvernig sem á stendur.  Jólin þurfa að gefa okkur þá gleði sem getur brosað í gegn um tárin.

Margir kvarta undan jólastressi og umbúðum jólanna og er það þá trúlega vegna þess að við höfum gert þau of glingursleg.  Spurningin er þá hvort eitthvert samband sé milli þess jólaheims sem við búum til og þess raunverulega heims sem við lifum í.

Fyrstu jólin voru engin glansmynd og var ekki ætlað slíkt hlutverk.  Þar var fátæk fjölskylda að takast á við erfiða tíma sem ekki sá fyrir endann á.  Mannssonurinn óx upp og átti hvergi höfði sínu að að halla.  Guð kallar enn á okkur til þess að framkvæma vilja Drottins Jesú Krists sem kom til að frelsa heiminn.  Hann birti Guð kærleika og friðar og sýndi það í verki.  Hann bannaði lærisveinum sínum að berjast og setti eyrað aftur á Malkus!  Kristin trú er friðarboðskapur, sem á að hafa áhrif á daglegt líf og gerir það að einhverju leyti.  Eitt eftirminnilegasta dæmið þar um er þegar hermennirnir í skotgröfum fyrri heimstyrjaldarinnar gerðu hlé á stríði sínu á jólanóttina.  Guð gefi að sá jólafriður breiðist út yfir alla daga lífsins.

Guð gefi þér kæri lesandi friðsæl og gleðileg jól.

Úlfar Guðmundsson.

Um höfundinn



4 viðbrögð við “Friður á jörðu og velþóknun yfir mönnunum”

  1. Matti skrifar:

    Áhugavert að þú minnist á stríðið í Írak strax og þú hefur afneitað tengslum trúarbragða og styrjalda. Varla neitar þú því að forseti Bandaríkjanna, sá sem hóf stríðin í Afganistan og Írak, er sannkristinn maður. Hann hefur nefnilega sjálfur sagt að gvuð (ég held þið trúið á sama gvuð) hafi sagt honum að ráðast inn í Afganistan og Írak.

    Hefur biskup eða ríkiskirkjan gefið út yfirlýsingu um stríðið í Írak annars vegar eða stuðning Íslands við það hins vegar?

    Er það svo ekki raunin að á því tímabili sem kennt er við myrkar miðaldir í Evrópu hafi ýmis menningarsamfélög utan Evrópu staðið Evrópu framar í mörgum málum? Þar er ég t.d. að hugsa um fróðlega sjónvarpsþætti um Mára sem sýndir voru í ríkissjónvarpinu fyrir skömmu.

  2. Árni Svanur Daníelsson skrifar:

    Þú spyrð um yfirlýsingar um Íraksstríðið:

    Biskup tók Íraksstríðið fyrir í nýársprédikun sinni 2003:

    Á morgni nýja ársins eru ófriðarblikur við sjóndeildarhring. Enn virðist sem ofurtrú manna á mátt hernaðar og valdbeitingar til að leysa vanda hnýti enn fastar þá hnúta sem fjötra heilu þjóðfélögin í vítahring ofbeldis, kúgunar og hermdaverka. Ávextirnir eru skelfing og dauði sem jörðinni spillir og lífinu ógnar. Það er sem ljósár aðskilji menningarheima og enn eykst gjáin milli ríkra og snauðra á okkar auðugu jörð. Enn er manndráp og neyðarkvein hlutskipti milljóna manna. Enn þetta ár, ef svo fer fram sem horfir, enn þetta ár. Kirkjuleiðtogar um víða veröld vara eindregið við stríði við Írak og hvetja til þess að reynt sé til þrautar að finna lausn friðar og réttlætis. Þar má nefna Jóhannes Pál páfa og forystumenn kirkna og kirknasambanda austan hafs og vestan. Ég hvet íslenska þjóð og kirkju að taka undir með þeim. Höldum fast í vonina um frið og réttlæti í samskiptum þjóða og trúarbragða, vinnum og biðjum að sú von rætist.

    Hann sendi líka frá sér yfirlýsingu vegna stríðsins í mars 2003:

    Við hörmum að enn skuli gripið til vígtólanna og þau látin skera úr deilumálum. Það er mikill ósigur fyrir mannkynið og vonir okkar um nýja heimsskipan þar sem siðgæðisleg megingildi væru í heiðri höfð, virðing fyrir alþjóðalögum, réttlæti og frelsi, mannúð og mildi.

    Um svipað leyti var tekið saman yfirlit yfir starf kirkjunnar í þágu friðar.

    Og svo samþykkti Prestastefna ályktun vegna stuðnings íslenskra stjórnvalda við stríðið í Írak.

    Ég vona að þetta svari spurningu þinni og gefi þér innsýn í það hvernig kirkjan hér á landi nálgaðist þetta stríð.

  3. Matti skrifar:

    Þakka þér fyrir Árni, þetta svarar spurningu minni.

  4. Grétar Einarsson skrifar:

    Það er rétt að benda Matta á að það má mjög deila um sannkristni Bandaríkjaforseta. Ákaflega margir kristnir álíta hann svo sannarlega ekki sannkristinn. Þetta er lélegur málflutningur hjá Matta enda geri ég ráð fyrir að hér sé um að ræða lélegan brandara af hans hálfu. Ályktanir kirkjunnar sem Árni Svanur reiðir hér fram ættu að vera nóg til að sýna fram það.

Allur réttur áskilinn © 2000-2017 Höfundar og þjóðkirkjan. Flettingar 3405.


Pistlar
Postilla
Almanak
Spurningar