Trúin og lífið
Pistlar


Undirsíður

Eftir sama höfund

Skyldir pistlar

Pistlar á trú.is eru birtir undir fullu nafni höfunda og eru á ábyrgð þeirra.



Leita í pistlum

Árni Svanur Daníelsson

Kvikmyndirnar, kirkjan og bíóhátíðin í Gautaborg

26. janúar 2006

Himnaríki og helvíti, Guð, þroski, trú og efi eru meðal umfjöllunarefna í myndunum sem keppa um aðalverðlaun kvikmyndahátíðarinnar í Gautaborg í ár. Myndirnar átta sem keppa um verðlaunin eru:

  • Beowulf & Grendel, leikstjóri Sturla Gunnarsson
  • Wellkåmm to Verona, leikstjóri Suzanne Osten
  • Voksne mennesker, leikstjóri Dagur Kári
  • Om Gud vill, leikstjóri Amir Chamdin
  • Matti - Hell is for Heroes, leikstjóri Aleksi Mäkelä
  • Izzat, leikstjóri Ulrik Imtiaz Rolfsen
  • Drømmen, leikstjóri Niels Arden Oplev (Denmark)
  • A Little Trip to Heaven, leikstjóri Baltasar Kormákur

Margir hafa eflaust heyrt af Gautaborgarhátíðinni og þekkja til aðalverðlaunanna þar - þetta er jú ein þekktasta kvikmyndahátíði Norðurlanda. Þau hafa meðal annars komið í skaut íslenskra kvikmynda, til að mynda Nóa Albinóa um árið.

Færri vita hinsvegar af því að myndirnar átta keppa einnig um önnur verðlaun, kirkjuleg kvikmyndaverðlaun. Sænska kirkjan veitir nefnilega árlega kvikmyndaverðlaun á Gautaborgarhátíðinni. Um þau verðlaun keppa sömu myndir og eru í aðalkeppninni og þau falla í skaut þeirri mynd sem þykir áhugaverðust sem glíma við trúar- og tilgangsspurningar.

Slík mynd þarf ekki að vera lögð upp eða skilgreind sem trúarmynd og trúarstefin þurfa ekki einu sinni að vera kristin. Það sem mestu máli skiptir er að myndin varpi áhugaverðu ljósi á þær spurningar sem glímt er við í kirkjunni. Ekki spillir svo fyrir ef hægt er að nota myndina í kirkjustarfi, sem innlegg í fræðslu, samtal og/eða prédikun.

Á undanförnum árum hafa þessi verðlaun fallið í skaut afar áhugaverðra mynda eins og Nóa Albinóa, Fyra nyanser av brunt og Paha Maa. Þessar þrjár myndir eru áhugaverð dæmi um myndir sem glíma við tilvistarspurningar án þess að gefa sig út fyrir að vera sérstaklega trúarlegar eða kristnar. Ef ég man rétt þá kom það aðstandendum þeirra allra meira að segja á óvart að fá kirkjuverðlaunin sænsku. Þegar Dagur Kári, leikstjóri Nóa Albinóa, tók við verðlaununum sagði hann að þetta væri sér hvatning, m.a. til að sækja kirkju reglulegar en hann hafði gert. Killinga-hópurinn sænski, sem fékk verðlaunin fyrir Fjögur tilbrigði við brúnt, var svo stoltur af sínum verðlaunum að þeirra var getið sérstaklega á veggspjaldi sem var dreift til kynningar myndinni - efst á spjaldinu!

Verðlaun af þessu tagi hafa a.m.k. þrennt í för með sér: Þau geta verið kvikmyndagerðarmönnum hvatning til að huga sérstaklega að tilvistar- og trúarstefjum í kvikmyndum auk þess sem þau geta verið hrós til þeirra sem gera slíkt vel, þau vekja athygli almennings á þessum víddum kvikmyndanna og þau eru starfsfólki kirkjunnar hvatning til að skoða nánar með hvaða hætti megi nota kvikmyndir í kirkjustarfi.

Undirritaður situr í dómnefnd vegna kvikmyndaverðlauna sænsku kirkjunnar þetta árið. Framundan er áhorf á átta áhugaverðar kvikmyndir. Verðlaunin verða svo afhent ásamt öðrum verðlaunum laugardaginn 4. febrúar næstkomandi. Í framhaldi af því munum við fjalla um nokkrar myndanna hér á vefnum og ræða um guðfræði, kvikmyndir og kirkjustarf.

Um höfundinn



5 viðbrögð við “Kvikmyndirnar, kirkjan og bíóhátíðin í Gautaborg”

  1. Grétar Einarsson skrifar:

    Hvernig væri að þjóðkirkjan kæmi að einhverju svona á einhverri þierra fjölmörgu kvikmyndahátiða sem fara fram hér á landi? Eða kannski er ekki vaninn þar að útnefna bestu myndina nema af áhorfendum?

  2. Irma Sjöfn skrifar:

    Takk fyrir góðan og upplýsandi pistil. Þetta er afar áhugvert.
    Á kvikmyndahátíðinni eru líka í gangi umræðuhópar hef ég heyrt í tengslum við valdar myndir út frá tilvistarspurningum (”Tala film tala liv” minnir mig að það heiti). Væri slíkt ekki líka spennandi verkefni fyrir kirkjuna hér heima í tengslum við kvikmyndahátíðir…

  3. Sigrún skrifar:

    Þetta hljómar spennandi og opnar eflaust fyrir nýjar víddir í túlkun. Tek einnig undir að spennandi væri að kanna okkar möguleika á að stæla svíana!

  4. Árni Svanur skrifar:

    Takk fyrir viðbrögðin. Það væri klárlega gaman að taka Svíana okkur til fyrirmyndar, bæði hvað varðar verðlaun af þessu tagi og fræðsluverkefnin. Það gæti verið möjg gagnlegt fyrir okkur að skoða hvaða möguleikar eru á samstarfi á þessu sviði.

    Annars er það nú svo að í byrjun mars hefst sex vikna „kvikmyndahátíð“ í Neskirkju. Þar stendur til að ræða um og sýna Jesúmyndir á sunnudögum frá upphafi föstu til Pálmasunnudags. Það ætti að geta verið býsna spennandi.

  5. Árni Svanur Daníelsson skrifar:

    Það er gaman að rifja þetta upp núna þegar Alþjóðlega kvikmyndahátíðin í Reykjavík er að hefjast. Þar verða kvikmyndaverðlaun kirkjunnar veitt í fyrsta skipti og Leikmannaskóli Þjóðkirkjunnar mun standa fyrir áhugaverðum námskeiðum, í anda Tala film, tala liv. Og svo verður Drömmen sýnd á hátíðinni, en hún hlaut einmitt verðlaun sænsku kirkjunnar á hátíðinni í Gautaborg.

Allur réttur áskilinn © 2000-2018 Höfundar og þjóðkirkjan. Flettingar 4158.


Pistlar
Postilla
Almanak
Spurningar