Aðventan er yndislegur tími. Sérstaklega fyrir börnin. Allir keppast við að finna sér allt mögulegt og ómögulegt að gera til að undirbúa jólin. Það eru óteljandi hlutir í boði og verður sá þáttur sem snýr að því að njóta og neyta fyrirferðameiri með hverju árinu.

Listinn yfir nauðsynlega hluti sem þarf að framkvæma fyrir jólin lengist sífellt. Það eru jólatónleikar, piparkökubakstur, laufabrauð, fara í Blómaval og skoða jólasveinana og svona mætti lengi telja. Vissulega er óhætt að taka undir það að okkur hættir til að gera undirbúning jólanna nokkuð yfirdrifin en það má ekki gleyma því að það eru stórkostleg forréttindi að fá að taka þátt í því að njóta og neyta.

Til hvers aðventan er ætluð

Um leið og við kennum börnunum okkar að njóta alls þess góða sem er í boði skiptir mestu máli að leyfa þeim að upplifa og læra til hvers aðventan eru ætluð. Aðventan er til að búa okkur undir komu jólanna, fæðingarhátíð frelsarans. Kristnu fólki ber að hugsa um náungan, ekki bara á aðventunni en neyð náungans verður meira áberandi á þessum tíma árs.

Umhyggja fyrir náunganum er partur af því að undirbúa okkur hið innra fyrir komu Jesú Krists. Og við fullorðna fólkið eigum að vera fyrirmynd æskunnar í því hvernig við nálgumst það verkefni. Það er gott að setjast niður með börnunum og unglingunum og tala við þau um boðskap jólanna og verður mikilvægi þess aldrei ofmetið. En það er ekki síður mikilvægt að láta verkin tala.

Margir foreldrar velta því fyrir sér hvernig hægt er að hjálpa börnunum sínum að íhuga boðskap jólanna og fá þau til að veita athygli hinum sanna jólaboðskap um leið og þau fái að njóta þeirrar gæfu að búa í svona góðu og gjöfulu samfélagi.

Góðverkadagatal

Eitt af því sem er til meira en nóg af hjá okkur hér á Fróni eru jóladagatölin. Það er mjög spennandi að fá jóladagatal sjónvarpsins, Íslandsbanki gleður litla viðskiptavini sína með forláta súkkulaðidagatölum. Á mínu heimili er til jóladagatal sem húsmóðir heimilisins saumaði út á Myndarlega Tímabilinu og hefur það hingað til verið hlaðið sælgæti.
Fyrir þessi jólin fékk útsaumaða dagatalið nýtt hlutverk.

Dagatalið er orðið að góðverkadagatali!

Í stað þess að vera yfirfyllt af sælgæti var það skreytt með miðum sem á er skrifað eitt góðverk fyrir hvern dag sem dagatalseigendurnir eiga að framkvæma samdægurs. Góðverkin geta verið til dæmis að inna af hendi eitthvert heimilisverk, hringja í afa eða hjálpa frænku, gefa fuglunum eða setja pening í Hjálparstarfsbaukinn. Þessi litla tilraun hefur orðið öllum til gleði sem hlut eiga að máli til gleði og er góðverkadagatalið vinsælasta dagatalið á heimilinu.

Mesti spenningurinn er að opna miðann og sjá hvaða góðverk bíður. Þegar góðverkin eru framkvæmd gefst svo oft gott tækifæri til að spjalla um það hvað það er mikilvægt fyrir okkur sjálf að geta gefið af okkur og gefið með okkur eins og hann boðaði okkur að gera, sá sem lagður var í jötu í fjárhúsi fyrir löngu síðan og hefur enn áhrif á líf okkar allra.

Um höfundinn